ബെംഗളൂരു: ബെംഗളൂരുവിൽ താമസസ്ഥലത്ത് എത്തിയ 6 അംഗ സംഘം മലയാളി വിദ്യാർഥികളെ ആക്രമിച്ചു കവർച്ച നടത്തി. കൊണനകുണ്ടയിൽ വെള്ളിയാഴ്ച അർധരാത്രിയിലാണ് സംഭവം. പാവമ്മ നഗറിലെ ബി.ജി. റോഡിലെ വാടകവീട്ടിൽ താമസിക്കുന്ന മൂന്ന് വിദ്യാർഥികളാണ് ആക്രമണത്തിന് ഇരയായത്. ആക്രമണത്തില് ഗുരുതര പരുക്കേറ്റ 2 പേരെ ആശുപത്രിയിൽ പ്രവേശിപ്പിച്ചു. നഗരത്തിലെ സ്വകാര്യ കോളേജിൽ ഹോട്ടൽ മാനേജ്മെന്റ് കോഴ്സിന് പഠിക്കുന്ന വിദ്യാർഥികളാണ് കവർച്ചയ്ക്കിരയായത്.
മാരകായുധങ്ങൾ ഉപയോഗിച്ച് ആക്രമിച്ച് മൂന്ന് മൊബൈൽ ഫോണുകൾ കവർന്നു. തുടർന്ന് പ്രതികളിലെ ഒരാളുടെ നമ്പറിലേക്ക് ഭീഷണിപ്പെടുത്തി 10,000 രൂപ ഗൂഗിൾ പേ വഴി അയപ്പിച്ച ശേഷമാണ് കവര്ച്ചാ സംഘം കടന്നുകളഞ്ഞത്.
വിദ്യാര്ഥികളുടെ പരാതിയില് കൊണനകുണ്ട പോലീസ് കേസെടുത്തു. തുറന്നുകിടന്ന പിൻവാതിലിലൂടെ കയറിയ അക്രമികൾ തമിഴാണു സംസാരിച്ചതെന്നും പരാതിയിൽ പറയുന്നു. പണമയച്ച നമ്പർ കേന്ദ്രീകരിച്ചും സമീപത്തെ സി.സി.ടി.വി. കൾ കേന്ദ്രീകരിച്ചും അന്വേഷണം നടക്കുകയാണെന്ന് പോലീസ് അറിയിച്ചു.
