ബെംഗളൂരു: ബെംഗളൂരു-തുമക്കൂരു അന്തര് ജില്ല മെട്രോ പദ്ധതി യാഥാര്ത്ഥ്യത്തിലേക്ക്. നമ്മ മെട്രോയു ഗ്രീന്ലൈന് തുമക്കൂരുവിലേക്ക് നീട്ടുന്നതിന്റെ വിശദമായ പദ്ധതി റിപ്പോര്ട്ട് (ഡിപിആര്) ബിഎംആര്സി സര്ക്കാരിനു സമര്പ്പിച്ചു. ഡിപിആര് അടുത്ത മന്ത്രിസഭാ യോഗത്തില് ചര്ച്ച ചെയ്യുമെന്ന് മന്ത്രി ജി.പരമേശ്വര പറഞ്ഞു.
ഗ്രീന് ലൈനില് സില്ക്ക് ഇന്സ്റ്റിറ്റ്യൂട്ട് മുതല് മാധവാര വരെയുള്ള ലൈനാണ് തുമക്കൂരുവിലേക്ക് നീട്ടുന്നത്. ബെംഗളൂരു നഗര, ബെംഗളൂരു ഗ്രാമ, തുമക്കൂരു ജില്ലകളെ ബന്ധിപ്പിച്ച് 59.60 കിലോമീറ്റര് ദൂരം വരുന്ന പാതയില് 26 സ്റ്റേഷനുകളുണ്ടാകും. മെട്രോയുടെ ഏറ്റവും ദൈര്ഘ്യമേറിയ പാതകൂടിയാണിത്. തുമക്കൂരുവിലേക്ക് റോഡ്, ട്രെയിന് മാര്ഗം നിലവില് 70 കിലോമീറ്റര് ദൂരമുണ്ട്. ഹൈദരാബാദ് ആസ്ഥാനമായ ഏജന്സിയാണ് 1.25 കോടിരൂപ ചെലവിട്ട് പഠനം പൂര്ത്തിയാക്കിയത്.
മക്കാലി, ദാസനപുര, നെലമംഗല, നെലമംഗല വീവേഴ്സ് കോളനി, നെലമംഗല ബസ് ടെര്മിനല്, വിശേശ്വരപുര, ടി.ബേഗൂര്, നെലമംഗല ടോള് ഗേറ്റ്,ബുദിഹാല്, ബിലനകോട്ടെ, സോമാപുര ഇന്ഡസ്ട്രി, കുളുവാനഹള്ളി, ഹിരേഹള്ളി, ദബാസ്പേട്ട്, പാണ്ഡിതനഹള്ളി, കൈത്തസന്ദ്ര ബൈപാസ്, എസ്ഐടി കോളജ്, തുംകൂര് സര്വകലാശാല, തുമക്കൂരു ബസ് ടെര്മിനല്, സിദ്ദഗംഗ മെഡിക്കല് കോളജ്, തുഡ ലേഔട്ട്, തുഡ ലേഔട്ട്, നാഗനപാളയ എന്നിവയാണ് നിര്ദിഷ്ട പാതയിലെ സ്റ്റേഷനുകള്. പദ്ധതി യാഥാര്ഥ്യമാകുന്നതോടെ തിരക്കേറിയ ബെംഗളൂരു-തുമക്കൂരു റൂട്ടിലെ ഗതാഗതം കൂടുതല് മെച്ചപ്പെടും. ബെംഗളൂരുവിലേക്ക് ദിവസേന വന്നുപോകുന്ന ജീവനക്കാര്, വിദ്യാര്ഥികള് എന്നിവരടക്കമുള്ള യാത്രക്കാര്ക്ക് പുതിയ പാത ഏറെ ഗുണം ചെയ്യും.
SUMMARY: Metro Green Line; Project report submitted for extension to Tumakuru
