ബെംഗളൂരു: മേക്കേദാട്ടു പദ്ധതി നടപ്പാക്കണമെന്ന് ആവശ്യപ്പെട്ട് ഓഗസ്റ്റ് 10ന് തമിഴ്നാട് അതിർത്തി അടയ്ക്കുമെന്ന് കന്നഡ അനുകൂല നേതാവ് വാട്ടാൽ നാഗരാജ് പ്രഖ്യാപിച്ചു. മേക്കേദാട്ടുവിനൊപ്പം മഹദായി, കൽസാ–ബണ്ഡൂരി പദ്ധതികളും വേഗത്തിൽ നടപ്പാക്കണമെന്നാണ് ആവശ്യം.
രാമനഗരയിലെ ഐജൂർ സർക്കിളിൽ നടത്തിയ പ്രതിഷേധത്തിനിടെയാണ് വാട്ടാൽ നാഗരാജ് പ്രഖ്യാപനം നടത്തിയത്. കാവേരി ജലവിഷയത്തിൽ തമിഴ്നാട് തുടർച്ചയായി കർണാടകയ്ക്ക് ബുദ്ധിമുട്ടുണ്ടാക്കുകയാണെന്നും ബെംഗളൂരുവിന്റെ കുടിവെള്ള ആവശ്യത്തിന് മേക്കേദാട്ടു പദ്ധതി അനിവാര്യമാണെന്നും അദ്ദേഹം പറഞ്ഞു.
ഓഗസ്റ്റ് 10ന് അത്തിബെലെ അതിർത്തി അടയ്ക്കുമെന്നാണ് വാട്ടാൽ നാഗരാജിന്റെ പ്രഖ്യാപനം. മേക്കേദാട്ടു പദ്ധതി നടപ്പാക്കുന്നതിന് പുറമെ ബിഡദി ടൗൺഷിപ്പ് പദ്ധതി പിൻവലിക്കണമെന്നും അദ്ദേഹം ആവശ്യപ്പെട്ടു.
ഇതിന് പിന്നാലെ ഓഗസ്റ്റ് 13ന് സംസ്ഥാനവ്യാപക കർണാടക ബന്ദിനും വാട്ടാൾ നാഗരാജ് ആഹ്വാനം ചെയ്തിട്ടുണ്ട്. ബന്ദ് പിൻവലിക്കണമെന്ന് മുഖ്യമന്ത്രി ആവശ്യപ്പെട്ടിരുന്നെങ്കിലും സർക്കാരുമായി ഇതുവരെ ചർച്ച നടന്നിട്ടില്ലെന്നും അതിനാൽ ബന്ദ് പിൻവലിക്കുന്ന പ്രശ്നമില്ലെന്നും അദ്ദേഹം വ്യക്തമാക്കി.
അതിർത്തി അടയ്ക്കാനുള്ള പ്രഖ്യാപനത്തിന്റെ പശ്ചാത്തലത്തിൽ ഓഗസ്റ്റ് 10ന് അത്തിബെലെ മേഖലയിൽ ഗതാഗതത്തെ ബാധിക്കുന്ന സാഹചര്യമുണ്ടാകുമോയെന്ന് അധികൃതർ പരിശോധിച്ചുവരികയാണ്. പ്രതിഷേധവുമായി ബന്ധപ്പെട്ട് പോലീസ് സുരക്ഷാ ക്രമീകരണങ്ങളും വിലയിരുത്തുന്നുണ്ട്.
SUMMARY: Vattal Nagaraj says Tamil Nadu border will be closed on August 10th over Mekedatu issue
