ബെംഗളൂരു: കുന്ദലഹള്ളി കേരളസമാജത്തിന്റെ ഓണാഘോഷം ‘കെകെഎസ് പൊന്നോണം 2026’ ഒക്ടോബർ 4 ന് ഞായറാഴ്ച കുന്ദലഹള്ളി സിഎംആര്‍ഐടി കോളേജ് ഓഡിറ്റോറിയത്തിൽ വിപുലമായ പരിപാടികളോടെ നടക്കും. സമാജം അംഗങ്ങൾ അവതരിപ്പിക്കുന്ന കലാപരിപാടികളോടൊപ്പം കേരളത്തിലെ പ്രശസ്തരായ കലാകാരന്മാര്‍ അവതരിപ്പിക്കുന്ന മെഗാഷോയും ഉണ്ടായിരിക്കും.
ഏഷ്യാനെറ്റ് ഐഡിയ സ്റ്റാർ സിങ്ങർ ജേതാവായ ശിവപ്രിയ, രണ്ടാംസ്ഥാനം നേടിയ അർജുൻ, നാടൻപാട്ട് ഗായകനായ സുരേഷ് പള്ളിപ്പാറ തുടങ്ങിയവർ നയിക്കുന്ന സംഗീതമേളയും കേരളത്തിലെ പ്രശസ്തരായ കലാകാരൻമാർ അണിയിച്ചൊരുക്കുന്ന തെയ്യങ്ങളും ചേർന്നതാണ് മെഗാഷോ.
ഓണാഘോഷത്തോടനുബന്ധിച്ച് കുന്ദലഹള്ളി കേരളസമാജം ബാംഗ്ലൂർ മലയാളികൾക്കായി പൂക്കളമത്സരവും റീൽ മത്സരവും സംഘടിപ്പിക്കുന്നു. ഈ മാസം 27 ന് തുബ്രഹള്ളിയിലെ ബിമല്‍ ലേ ഔട്ടിലെ സമാജം ഓഫീസിലാണ് പൂക്കളമത്സരം സംഘടിപ്പിക്കുന്നത്. നിശ്ചിത എണ്ണം ടീമുകൾക്ക് മാത്രമേ മത്സരത്തിൽ പങ്കെടുക്കാൻ അവസരം ലഭിക്കുകയുള്ളൂ. രജിസ്‌ട്രേഷൻ ചാർജ് ഉണ്ടായിരിക്കുന്നതാണ്. ഒന്നാം സമ്മാനം പതിനായിരം രൂപയും ട്രോഫിയും രണ്ടാം സമ്മാനം അയ്യായിരം രൂപയും ട്രോഫിയും മൂന്നാംസമ്മാനം മൂവായിരം രൂപയും ട്രോഫിയുമാണ് വിജയികൾക്ക് ലഭിക്കുന്നത്. പൂക്കളമത്സരത്തിൽ പങ്കെടുക്കാൻ താല്പര്യമുള്ളവർ ബന്ധപ്പെട്ട മറ്റു വിവരങ്ങൾക്കും: 9901794155
റീൽ മത്സരത്തിൽ പങ്കെടുക്കുന്നവർ സെപ്റ്റംബർ 27 നകം അവരുടെ വീഡിയോ ബന്ധപ്പെട്ട കമ്മിറ്റിയെ ഏല്പിക്കേണ്ടതാണ്. തിരഞ്ഞെടുക്കുന്ന റീലുകൾ ഓണാഘോഷവേദിയിൽ പ്രദർശിപ്പിക്കുന്നതായിരിക്കും. പങ്കെടുക്കാൻ താല്പര്യമുള്ളവർ മത്സരവുമായി ബന്ധപ്പെട്ട മറ്റു വിവരങ്ങൾക്ക്: 9886799766).
സമാജത്തിന്റെ ഓണാഘോഷം നടക്കുന്ന ഒക്ടോബർ നാലിന് സിഎംആര്‍ഐടി ഓഡിറ്റോറിയത്തിൽ വെച്ചായിരിക്കും രണ്ടുമത്സരത്തിന്റേയും വിജയികൾക്കുള്ള സമ്മാനം വിതരണം ചെയ്യുന്നത്. പരിപാടിയെക്കുറിച്ചുള്ള കൂടുതൽ വിവരങ്ങൾക്കും ടിക്കറ്റിനുമായി ബന്ധപ്പെടുക: 9845751628 , 9449538245.
SUMMARY: Kundalahalli Kerala Samajam Onam celebrations on October 4th
