കൊച്ചി: മാധ്യമ പ്രവർത്തകൻ കെഎം ബഷീറിനെ വാഹനമിടിച്ച്‌ കൊലപ്പെടുത്തിയ കേസിന്റെ വിചാരണ സ്റ്റേ ചെയ്‌ത് ഹൈക്കോടതി. പ്രോസിക്യൂട്ടർ നിയമനവുമായി ബന്ധപ്പെട്ട രേഖകള്‍ ഹാജരാക്കാൻ സർക്കാരിന് കോടതി നിർദേശം നല്‍കി. കേസിന്റെ വിചാരണയുമായി ബന്ധപ്പെട്ട്‌ ബഷീറിന്റെ ഭാര്യ ജെസീല നേരത്തെ ഹൈക്കോടതിയെ സമീപിച്ചിരുന്നു.
വിചാരണക്കോടതി മാറ്റണം, കേസില്‍ സ്‌പെഷ്യല്‍ പ്രോസിക്യൂട്ടറെ നിയമിക്കണം തുടങ്ങിയ ആവശ്യങ്ങളാണ് ജസീല ഉന്നയിച്ചത്. നിലവിലുള്ള പ്രോസിക്യൂട്ടർ കൃത്യമായി കേസ് കൈകാര്യം ചെയ്യുന്നില്ലെന്നാരോപിച്ചാണ് സ്‌പെഷ്യല്‍ പ്രോസിക്യൂട്ടറെ നിയമിക്കണമെന്ന് ജസീല ആവശ്യപ്പെട്ടത്. കേസില്‍ സ്‌പെഷ്യല്‍ പ്രോസിക്യൂട്ടറെ നിയമിക്കുമെന്ന് ഉറപ്പ് നല്‍കിയ സർക്കാർ, അഡ്വക്കേറ്റ് സന്തോഷിനെ ആ സ്ഥാനത്തേക്ക് നിർദേശിക്കുകയും ചെയ്‌തു.
എന്നാല്‍, പിന്നീട് ഇക്കാര്യത്തില്‍ തുടർനടപടികള്‍ ഉണ്ടായില്ല. ഇക്കാര്യം ചൂണ്ടിക്കാണിച്ചുകൊണ്ട് ജസീല വീണ്ടും ഹൈക്കോടതിയില്‍ ഹർജി നല്‍കുകയായിരുന്നു. ഇതേതുടർന്നാണ് വിചാരണ നടപടികള്‍ നിർത്തിവയ്‌ക്കാനും സ്‌പെഷ്യല്‍ പ്രോസിക്യൂട്ടർ നിയമനത്തില്‍ സർക്കാർ സ്വീകരിച്ച നടപടികള്‍ വിശദീകരിക്കുന്ന രേഖകള്‍ ഹാജരാക്കാനും ഹൈക്കോടതി നിർദേശിച്ചത്.
SUMMARY: Case involving the death of K.M. Basheer after being struck by a vehicle: High Court stays trial proceedings
