ബെംഗളൂരു: നോർക്ക കെയർ ഇൻഷുറൻസ് പ്രീമിയം തുക കുത്തനെ കൂട്ടിയതിനെതിരെ പ്രതിഷേധവും തുടർനടപടികളും ചർച്ച ചെയ്യുന്നതിനായി ബെംഗളൂരുവിൽ പ്രവാസി മലയാളി സംഘടനകളുടെ സംയുക്ത യോഗം ചേർന്നു. ജയനഗർ ഒമ്പതാം ബ്ലോക്കിലെ ബെംഗളൂരു മലയാളി ഫോറം(ബി.എം.എഫ്) ഓഫീസിൽ നടന്ന യോഗത്തിൽ ബി.എം.എഫ് പ്രസിഡണ്ട് ജോജോ പി.ജെ അധ്യക്ഷത വഹിച്ചു. സെക്രട്ടറി ഷിബു ശിവദാസ് സ്വാഗതം പറഞ്ഞു.
നോർക്ക കെയർ, നോർക്ക കെയർ പ്ലസ് ഇൻഷുറൻസ് പ്രീമിയം വർധനവിൽ യോഗം ശക്തമായ പ്രതിഷേധം രേഖപ്പെടുത്തി. എഐകെഎംസിസി, ശ്രീനാരായണ സമതി അൾസൂർ, കേരളസമാജം സിറ്റി സോൺ, സുവർണ കർണാടക കേരള സമാജം, ക്രിസ്റ്റഫർ അസോസിയേഷൻ, കേരള എൻജിനീയേഴ്സ് അസോസിയേഷൻ, തേജസ്‌ ചാരിറ്റബിൾ ട്രെസ്റ്റ്, നന്മ ബെംഗളൂരു കേരള സമാജം, സൗത്ത് ബാംഗ്ലൂർ മലയാളി അസോസിയേഷൻ, മണികണ്ഠ സേവാസമിതി, എന്നീ പ്രമുഖ മലയാളി സംഘടനകളുടെ പ്രതിനിധികൾ യോഗത്തിൽ പങ്കെടുത്തു.
ചൊവ്വാഴ്ച രാവിലെ 10.30 ന് ശിവാജിനഗർ, ഇൻഫന്ററി റോഡിലുള്ള നോർക്ക സോണൽ ഓഫീസിൽ എല്ലാ സംഘടനകളും ചേർന്ന് കൂട്ട ധർണ നടത്തുവാനും, കേരള മുഖ്യമന്ത്രി വി ഡി.സതീശനെ നേരിൽകണ്ട് നിവേദനം സമർപ്പിക്കുവാനും യോഗത്തിൽ തീരുമാനിച്ചു.
