ചെന്നൈ: തമിഴ്‌നാട്ടിലെ അരിയലൂർ ജില്ലയിൽ പൊതുസ്ഥലത്ത് മദ്യപിക്കുന്നത് ചോദ്യം ചെയ്ത ഹോം ഗാർഡിനെ പ്രതികൾ മർദിച്ച് കൊലപ്പെടുത്തി. സെന്തുറൈക്ക് സമീപമുള്ള തളവായ് പോലിസ് സ്റ്റേഷൻ പരിധിയിൽ പട്രോളിംഗ് ഡ്യൂട്ടിയിലുണ്ടായിരുന്ന വെങ്കടേശൻ ആണ് ചികിത്സയിലിരിക്കെ മരണപ്പെട്ടത്.
ഒക്ടോബർ 29-നായിരുന്നു സംഭവം. രാത്രി പൊലീസ് കോൺസ്റ്റബിൾ രാജാകണ്ണും വെങ്കടേശനും പട്രോളിംഗ് നടത്തുന്നതിനിടെ സ്വകാര്യ സിമന്റ് ഫാക്ടറിക്ക് സമീപം മൂന്നുപേർ മദ്യപിക്കുന്നത് ശ്രദ്ധയിൽപ്പെട്ടു. ഇവരോട് അവിടെനിന്ന് മാറിപ്പോകാൻ ഇരുവരും മുന്നറിയിപ്പ് നൽകി.
പുലർച്ചെയോടെ ഇതേ സംഘം വിനായകർ ക്ഷേത്രത്തിന് സമീപം വീണ്ടും മദ്യപിക്കുന്നത് പട്രോളിംഗ് സംഘത്തിന്റെ ശ്രദ്ധയിൽപ്പെട്ടു. ഇത് ചോദ്യം ചെയ്തതോടെ പ്രകോപിതരായ പ്രതികൾ കോൺസ്റ്റബിൾ രാജാകണ്ണിനെ തടഞ്ഞുവയ്ക്കുകയും വെങ്കടേശനെ മർദിക്കുകയുമായിരുന്നു. മുഖത്തും തലയിലും ക്രൂരമായി മർദനമേറ്റ വെങ്കടേശൻ ബോധരഹിതനായി വീണു.
ഉടൻതന്നെ മറ്റു പോലീസുകാർ ചേർന്ന് വെങ്കടേശനെ സെന്തുറൈ സർക്കാർ ആശുപത്രിയിൽ എത്തിച്ചു. പിന്നീട് തിരുച്ചിറപ്പള്ളിയിലെ സ്വകാര്യ ആശുപത്രിയിലേക്കും വിദഗ്ധ ചികിത്സയ്ക്കായി തഞ്ചാവൂർ മെഡിക്കൽ കോളേജ് ആശുപത്രിയിലേക്കും മാറ്റി. എന്നാൽ ചികിത്സയ്ക്കിടെ മരണം സംഭവിക്കുകയായിരുന്നു. സംഭവവുമായി ബന്ധപ്പെട്ട് മൂന്ന് പ്രതികളെയും പോലീസ് അറസ്റ്റ് ചെയ്തിട്ടുണ്ട്.
SUMMARY: Home guard beaten to death after questioning public drinking; three arrested
