ഉജ്ജയിൻ: മധ്യപ്രദേശിലെ ഉജ്ജയിനിൽ സ്വകാര്യ ഹോട്ടലിലെ മാലിന്യ അറ വൃത്തിയാക്കുന്നതിനിടെ ശ്വാസംമുട്ടി നാല് പേർ മരിച്ചു. ശനിയാഴ്ച രാത്രി 11ഓടെ ഉജ്ജയിൻ–ദേവാസ് റോഡിലെ ശ്രീ ഗംഗ ഹോട്ടലിലാണ് സംഭവം. ഇവരെ രക്ഷിക്കാൻ അറയ്ക്കുള്ളിൽ പ്രവേശിച്ച രണ്ടുപേർക്കും ദേഹാസ്വാസ്ഥ്യമുണ്ടായി. മാലിന്യ അറ വൃത്തിയാക്കാൻ നാല് പേർ അകത്തുകയറിയെങ്കിലും പുറത്തുവരാനാകാതെ കുടുങ്ങുകയായിരുന്നു. ശ്വാസംമുട്ടിയാണ് ഇവർ മരിച്ചതെന്നാണ് പ്രാഥമിക നിഗമനം. പോലീസും അഗ്നിരക്ഷാസേനയും ചേർന്ന് പുറത്തെടുത്ത ഇവർക്ക് സി.പി.ആർ നൽകിയെങ്കിലും ജീവൻ രക്ഷിക്കാനായില്ല. ആശുപത്രിയിലെത്തിച്ചപ്പോഴേക്കും മരണം സംഭവിച്ചതായി ഡോക്ടർമാർ സ്ഥിരീകരിച്ചു.
കമലേഷ് തംബോളി, നിതിൻ വാൽമിക്, മനോജ് മീണ, വാഹിദ് എന്നിവരാണ് മരിച്ചത്. തൊഴിലാളികൾ അറ വൃത്തിയാക്കാൻ സ്വമേധയാ അകത്തുകയറിയതാണോ അതോ അബദ്ധത്തിൽ വീണതാണോ എന്ന് അന്വേഷിച്ചുവരികയാണെന്ന് ഉജ്ജയിൻ ജില്ലാ മജിസ്ട്രേറ്റ് റോഷൻ കുമാർ സിങ് അറിയിച്ചു. മൃതദേഹങ്ങൾ പോസ്റ്റ്മോർട്ടത്തിനായി അയച്ചിട്ടുണ്ട്. സംഭവത്തിൽ മുഖ്യമന്ത്രി മോഹൻ യാദവ് ദുഃഖം രേഖപ്പെടുത്തി. മരിച്ചവരുടെ കുടുംബങ്ങൾക്ക് നാല് ലക്ഷം രൂപ വീതം ധനസഹായം പ്രഖ്യാപിച്ചു. ഉജ്ജയിൻ സ്വദേശിയായ മുഖ്യമന്ത്രി, കുടുംബങ്ങൾക്ക് സഹായം നൽകാൻ സംസ്ഥാന സർക്കാരിന് നിർദേശം നൽകിയതായും അറിയിച്ചു.
SUMMARY: Four people died of suffocation while cleaning the waste chamber at a hotel.
