ബെംഗളൂരു: കേരളീയം മലയാളി അസോസിയേഷന്റെ ആഭിമുഖ്യത്തിൽ പ്രസ്റ്റീജ് ജിൻഡാൽ സിറ്റിയിൽ അരങ്ങേറിയ ‘ഭ്രാന്തിപ്പൂവ്’ നാടകം പ്രേക്ഷകരുടെ മനസ്സും ഹൃദയവും കീഴടക്കിയ മികച്ച കലാവിരുന്നായി മാറി. ലളിതവും സരസവുമായ സംഭാഷണങ്ങളിലൂടെ ഒരു കുടുംബകഥയായി ആരംഭിച്ച നാടകം, ആദ്യപകുതി പിന്നിടുമ്പോഴേക്കും പ്രേക്ഷകരെ ആകാംക്ഷയുടെയും പിരിമുറുക്കത്തിന്റെയും ഉച്ചസ്ഥായിയിലെത്തിച്ചു. കഥയുടെ ഓരോ ഘട്ടത്തിലും നാടകീയത വർധിപ്പിച്ച അവതരണം പ്രേക്ഷകരെ അവസാനം വരെ ആകാംക്ഷയോടെ പിടിച്ചിരുത്തി.
യുവതലമുറയിലും വിദ്യാർത്ഥികളിലും അതിവേഗം വ്യാപിച്ചുകൊണ്ടിരിക്കുന്ന മാരകമായ ലഹരിമരുന്ന് ഉപയോഗത്തിനെതിരെ ശക്തമായ സാമൂഹിക സന്ദേശമാണ് ‘ഭ്രാന്തിപ്പൂവ്’ മുന്നോട്ടുവെച്ചത്. കുടുംബബന്ധങ്ങളെയും പുതുതലമുറ നേരിടുന്ന സാമൂഹിക വെല്ലുവിളികളെയും കൂട്ടിയിണക്കി ലഹരിയുടെ വിനാശകരമായ പ്രത്യാഘാതങ്ങൾ നാടകം ശക്തമായി അവതരിപ്പിച്ചു.
ബെംഗളൂരുവിലെ പുതുതലമുറയിൽപ്പെട്ട 15-ഓളം അഭിനേതാക്കൾ ഒരുമിച്ചണിനിരന്ന നാടകത്തിൽ യുവതലമുറയുടെ മികച്ച അഭിനയപ്രകടനമാണ് അരങ്ങിൽ നിറഞ്ഞത്. സ്വാഭാവികമായ അഭിനയവും സംഭാഷണങ്ങളുടെ മികവും അവതരണത്തിലെ ചടുലതയും നാടകത്തെ കൂടുതൽ ശ്രദ്ധേയമാക്കി.
സുരേഷ് പാൽകുളങ്ങര രചിച്ച ‘ഭ്രാന്തിപ്പൂവിന്റെ സംവിധാനം രഞ്ജിത്താണ് നിർവഹിച്ചിരിക്കുന്നത്. കലയും സാമൂഹിക പ്രതിബദ്ധതയും ഒരുപോലെ സമന്വയിപ്പിച്ച അവതരണത്തിലൂടെ ലഹരിക്കെതിരായ ശക്തമായ സന്ദേശം സമൂഹത്തിന് മുന്നിലെത്തിക്കാൻ നാടകസംഘത്തിന് കഴിഞ്ഞു. പ്രേക്ഷകർക്ക് മികച്ചൊരു നാടകാനുഭവം സമ്മാനിച്ചതിനൊപ്പം, ലഹരിവിരുദ്ധ ബോധവൽക്കരണത്തിന്റെ ശക്തമായ വേദിയായും നാടക പ്രദർശന വേദി മാറി.
