ന്യൂഡൽഹി: ഒരു പ്രതിഷേധസ്ഥലവും അനിശ്ചിതകാലത്തേക്ക് പിടിച്ചുവയ്ക്കാനാകില്ലെന്ന് സുപ്രീംകോടതി. സമരങ്ങൾക്ക് നിയന്ത്രണവും സമയപരിധിയും വേണമെന്ന് ചീഫ് ജസ്റ്റിസ് വ്യക്തമാക്കി. കേന്ദ്ര തിരഞ്ഞെടുപ്പ് കമ്മിഷനെതിരെ കഴിഞ്ഞ മാസം ജന്തർമന്തറിലും, രാംലീല മൈതാനിയിലും നടന്ന വൻ പ്രതിഷേധങ്ങൾക്കെതിരായ ഹർജികൾ പരിഗണിക്കവെയാണ് സുപ്രിംകോടതിയുടെ നിർണായക കണ്ടെത്തൽ. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചിന്റേതാണ് നിരീക്ഷണം. രാജ്യത്ത് എല്ലാവർക്കും പ്രതിഷേധിക്കാനുള്ള അവകാശമുണ്ടെങ്കിലും, അത് മറ്റുള്ളവരുടെ അവകാശങ്ങളെ ബാധിക്കുന്ന വിധത്തിലാകരുതെന്ന് കോടതി ഓർമ്മിപ്പിച്ചു. കിരാന കമ്മിറ്റി ഡൽഹി ഉൾപ്പെടെയുള്ള വ്യാപാരി സംഘടനകൾ കോടതിയെ സമീപിച്ചപ്പോഴാണ് നിർണായക നിരീക്ഷണം. സമരത്തെ തുടർന്ന് വ്യാപാരികൾക്കുണ്ടായ നഷ്ടത്തിൽ സമരക്കാരെ എതിർകക്ഷികളാക്കാൻ കോടതി നിർദേശിച്ചു.
സമരങ്ങൾക്കായി നിശ്ചയിച്ചിട്ടുള്ള സ്ഥലങ്ങൾ അനിശ്ചിതകാലത്തേക്ക് ഒരു വിഭാഗത്തിന് മാത്രം കൈവശം വയ്ക്കാനാകില്ല. എല്ലാവർക്കും പ്രതിഷേധിക്കാൻ അവകാശമുണ്ട്, കർഷകരും തൊഴിലാളികളും മാധ്യമപ്രവർത്തകരുമടക്കം മറ്റുള്ളവർക്കും അതിനുള്ള അവസരം ലഭിക്കണമെന്നും ചീഫ് ജസ്റ്റിസ് പറഞ്ഞു. ഒരു കൂട്ടർ സമരം നടത്തുമ്പോൾ മറ്റുള്ളവർക്ക് അതിനുള്ള അവസരം നിഷേധിക്കാനാകില്ല. സമരങ്ങൾക്ക് അനുമതി നൽകുമ്പോൾ സമയപരിധിയും വ്യവസ്ഥകളും കൃത്യമായി നിശ്ചയിക്കണമെന്നും കോടതി നിരീക്ഷിച്ചു.
സമരങ്ങൾ നടക്കുമ്പോൾ തന്നെ ചെറിയ കച്ചവടക്കാരുടെയും വഴിയോര കച്ചവടക്കാരുടെയും ഉപജീവനത്തിനുള്ള അവകാശവും സംരക്ഷിക്കപ്പെടേണ്ടതുണ്ടെന്ന് കോടതി നിരീക്ഷിച്ചു. ചിലപ്പോൾ ഇത്തരം സമരങ്ങൾ വഴിയോര കച്ചവടക്കാർക്ക് ചെറിയ തോതിൽ സാമ്പത്തിക നേട്ടങ്ങൾ നൽകുന്ന ഒരു പ്രൊട്ടസ്റ്റ് ഇക്കോണമി സൃഷ്ടിക്കാറുണ്ടെന്നും കോടതി പരാമർശിച്ചു. സമരത്തോടനുബന്ധിച്ച് ഗതാഗത തടസ്സങ്ങൾ, മെട്രോ സ്റ്റേഷനുകൾ അടച്ചിടൽ, ഇന്റർനെറ്റ് വിച്ഛേദിക്കൽ തുടങ്ങിയ ബുദ്ധിമുട്ടുകളും വലിയതോതിൽ ചർച്ചയായിരുന്നു. ഉത്സവ സീസണിലെ കച്ചവടത്തെ ഇത് പ്രതികൂലമായി ബാധിക്കുമെന്ന ആശങ്കയും വ്യാപാരികൾ പങ്കുവെച്ചു.
SUMMARY: Supreme Court says protests should have restrictions and time limits.
