ബെംഗളൂരു: താമസമേഖലകളിൽ നിയമാനുസൃത അനുമതികളില്ലാതെ പ്രവർത്തിച്ചിരുന്ന 63 വ്യാപാരസ്ഥാപനങ്ങൾ അടച്ചുപൂട്ടി ഗ്രേറ്റർ ബെംഗളൂരു അതോറിറ്റി. ബെംഗളൂരു സൗത്ത് സിറ്റി കോർപ്പറേഷൻ പരിധിയിലാണ് പരിശോധന നടത്തി നടപടി സ്വീകരിച്ചത്. ഇതിൽ 30 കടകളും ബിടിഎം ലേഔട്ടിലാണ്.
40 അടിയിൽ താഴെ വീതിയുള്ള റോഡുകളുള്ള താമസമേഖലകളിൽ അനുമതിയില്ലാതെ പ്രവർത്തിച്ചിരുന്ന സ്ഥാപനങ്ങളെയാണ് അധികൃതർ ലക്ഷ്യമിട്ടത്. ബേക്കറികൾ, ഭക്ഷ്യവിൽപ്പനശാലകൾ, സലൂണുകൾ, ബ്യൂട്ടി പാർലറുകൾ, പഴം-പച്ചക്കറി കടകൾ തുടങ്ങിയവ പരിശോധനയിൽ ഉൾപ്പെട്ടു.
ബിടിഎം ലേഔട്ടിന് പുറമെ ജയനഗർ, ബൊമ്മനഹള്ളി, പദ്മനാഭനഗർ, ബെംഗളൂരു സൗത്ത് തുടങ്ങിയ പ്രദേശങ്ങളിലും പരിശോധന നടത്തി. താമസമേഖലകളിലെ കെട്ടിടങ്ങളുടെ ഉപയോഗം സംബന്ധിച്ച ചട്ടങ്ങൾ ലംഘിച്ച് വാണിജ്യപ്രവർത്തനങ്ങൾ നടത്തുന്ന സ്ഥാപനങ്ങൾക്കെതിരെയാണ് നടപടി സ്വീകരിച്ചതെന്ന് അധികൃതർ വ്യക്തമാക്കി.
താമസമേഖലകളിൽ അനിയന്ത്രിതമായി വ്യാപാരസ്ഥാപനങ്ങൾ പ്രവർത്തിക്കുന്നത് ഗതാഗതക്കുരുക്ക്, പാർക്കിങ് പ്രശ്നങ്ങൾ, മാലിന്യനിക്ഷേപം, ശബ്ദമലിനീകരണം തുടങ്ങിയ ബുദ്ധിമുട്ടുകൾ സൃഷ്ടിക്കുന്നുവെന്ന പരാതികൾ ഉയർന്നിരുന്നു.
ഇത്തരം പ്രശ്നങ്ങൾ നിയന്ത്രിക്കാനും നഗരത്തിലെ ഭൂവിനിയോഗ ചട്ടങ്ങൾ നടപ്പാക്കാനുമാണ് പരിശോധന ശക്തമാക്കിയത്.നിയമവിരുദ്ധമായി പ്രവർത്തിക്കുന്ന മറ്റ് സ്ഥാപനങ്ങൾക്കെതിരെയും പരിശോധന തുടരുമെന്ന് ജി.ബി.എ അധികൃതർ അറിയിച്ചു.
SUMMARY: GBA shuts down 63 illegal shops, including those in BTM Layout.
