ബെംഗളൂരു: വിവാഹത്തെക്കുറിച്ച് സംസാരിക്കാനെന്ന വ്യാജേന വിളിച്ചുവരുത്തി യുവതിയെ കാമുകൻ ക്രൂരമായി ശ്വാസം മുട്ടിച്ച് കൊലപ്പെടുത്തി. കർണാടകയിലെ പ്രശസ്തമായ ഗോകാക് വെള്ളച്ചാട്ടത്തിന് (Gokak Falls) സമീപമാണ് നാടിനെ നടുക്കിയ സംഭവം നടന്നത്. ഹാരോഗേരി ഗ്രാമവാസിയായ 25-കാരി രക്ഷിത സാരികാറാണ് കൊല്ലപ്പെട്ടത്. സംഭവവുമായി ബന്ധപ്പെട്ട് രക്ഷിതയുടെ കാമുകനും സെൻട്രൽ ആംഡ് പോലീസ് ഫോഴ്‌സ് (CAPF) കോൺസ്റ്റബിളുമായ ബസപ്പ സാതന്നവറിനെ പോലീസ് അറസ്റ്റ് ചെയ്തു.
ഫാഷൻ ഡിസൈനറായ രക്ഷിതയും ബസപ്പയും കഴിഞ്ഞ നാല് വർഷമായി പ്രണയത്തിലായിരുന്നു. ഒക്ടോബർ 28-നാണ് കറങ്ങാൻ പോകാമെന്ന് പറഞ്ഞ് ബസപ്പ രക്ഷിതയെ ഗോകാക് വെള്ളച്ചാട്ടത്തിന് സമീപമുള്ള വിജനമായ സ്ഥലത്തേക്ക് വിളിച്ചുവരുത്തിയത്. ഇവിടെവെച്ച് വിവാഹത്തെച്ചൊല്ലി ഇരുവരും തമ്മിൽ തർക്കമുണ്ടായി. തർക്കം രൂക്ഷമായതോടെ ബസപ്പ യുവതിയെ ക്രൂരമായി മർദ്ദിക്കുകയും തുടർന്ന് ശ്വാസം മുട്ടിച്ച് കൊലപ്പെടുത്തുകയുമായിരുന്നു. തുടർന്ന് മൃതദേഹം വെള്ളച്ചാട്ടത്തിന് സമീപത്തെ മലഞ്ചെരുവിൽ ഉപേക്ഷിച്ച് ബസപ്പ കടന്നുകളയുകയായിരുന്നു.
കൊലപാതകത്തിന് ശേഷം ഒന്നുമറിയാത്ത ഭാവത്തിൽ പ്രതി വീട്ടിലേക്ക് മടങ്ങി. യുവതിയെ കാണാതായതിനെ തുടർന്ന് സഹോദരൻ നൽകിയ പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. സംശയം തോന്നിയ ബസപ്പയെ ചോദ്യം ചെയ്തതോടെയാണ് ക്രൂരകൃത്യം പുറത്തറിയുന്നത്. ഗോകാക് ടൗൺ പോലീസ് സ്റ്റേഷനിൽ കേസ് രജിസ്റ്റർ ചെയ്യുകയും പ്രതിയെ കസ്റ്റഡിയിലെടുക്കുകയും ചെയ്തിട്ടുണ്ട്. കൂടുതൽ അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
SUMMARY: Summoned to talk about marriage; The young woman was suffocated by her boyfriend.
