ബെംഗളൂരു: കർണാടകയിൽ സൈനികനെ അതിക്രൂരമായി ആക്രമിച്ച് മദ്യപ സംഘം. തുമകുരു കൊരട്ടഗെരെ താലൂക്കിലെ ബൈരേനഹള്ളി ക്രോസിന് സമീപമാണ് സംഭവം. ജമ്മു കശ്മീരിലെ രാജൗരി ജില്ലയിൽ നിയമിതനായ ഗോവിന്ദരാജു (30) ആണ് ആക്രമണത്തിനിരയായത്.
അവധിക്ക് നാട്ടിലേക്ക് വന്നതായിരുന്നു ഗോവിന്ദരാജു. കഴിഞ്ഞ ദിവസം കടയിൽ പോയി വീട്ടിലേക്ക് മടങ്ങുകയായിരുന്ന ഗോവിന്ദയെ അഞ്ചംഗ മദ്യപസംഘം തടഞ്ഞുനിർത്തി ആക്രമിക്കുകയായിരുന്നു.
കൊരട്ടഗെരെ താലൂക്കിലെ അരസപുര സ്വദേശി ഭരത് (29), മധുഗിരി താലൂക്കിലെ കൊടഗദലയിലുള്ള പുനീത് (32), ഹുനസവാദിയിലെ ഗൗരിശങ്കർ (32), കൊടിഗെനഹള്ളിക്കടുത്ത് ബട്ടഗെരെയിലെ ശിവ (32), ദിലീപ് (35) എന്നിവരാണ് ഗോവിന്ദയെ ആക്രമിച്ചത്. സംഭവത്തെ തുടർന്ന് ഗോവിന്ദ ഉടൻ പോലീസിൽ പരാതി നൽകി. കേസിൽ പുനീത്, ഭരത് എന്നിവരെ പോലീസ് അറസ്റ്റ് ചെയ്തു. മറ്റുള്ളവർ ഒളിവിലാണ്. ഇവരെ കണ്ടെത്താനുള്ള തിരച്ചിൽ ഊർജിതമാക്കിയതായി പോലീസ് പറഞ്ഞു.
