ദേശീയഗാനത്തെ അപമാനിച്ചെന്ന് ആരോപിച്ച് തമിഴ്നാട് ഗവര്ണര് ആര്എന് രവി നിയമസഭയില് നിന്നും ഇറങ്ങിപ്പോയി. പ്രസംഗം നടത്താന് വിസമ്മതിക്കുകയും ഗവര്ണര് വായിക്കേണ്ട പതിവ് പ്രസംഗം നിയമസഭാ സ്പീക്കര് നടത്തുകയും ചെയ്തു. നിയമസഭ തുടങ്ങുമ്പോഴും ഒടുക്കവും ദേശീയഗാനം ആലപിക്കണമെന്ന ഗവര്ണറുടെ ആവശ്യം സഭ അംഗീകരിക്കാതെ വന്നതോടെയായിരുന്നു വിവാദം.
എന്നാല് ദേശീയ ഗാനം ഒഴിവാക്കിയതല്ലെന്നും നയപ്രഖ്യാപനത്തിന് ശേഷമാണ് ദേശീയ ഗാനം ആലപിക്കാറുള്ളതെന്നുമാണ് സർക്കാർ വിശദീകരണം. തുടർച്ചയായ മൂന്നാം തവണയാണ് നയപ്രഖ്യാപന പ്രസംഗവുമായി ബന്ധപ്പെട്ട് തമിഴ്നാട് നിയമസഭയില് അസാധാരണ രംഗങ്ങള് ഉണ്ടാകുന്നത്. നേരത്തെ പ്രസംഗത്തിന്റെ ഭാഗങ്ങള് ഒഴിവാക്കുകയോ ഒരു വരി മാത്രം വായിച്ചു മടങ്ങുകയോ ചെയ്തിട്ടുള്ള ഗവർണർ ഇത്തവണ സഭ സമ്മേളിച്ച് മിനിറ്റുകള് മാത്രമായപ്പോള് ഇറങ്ങിപ്പോയി.
സഭ ചേർന്നപ്പോള് തുടക്കം തന്നെ തമിഴ്നാടിന്റെ ഔദ്യോഗിക ഗാനമായ തമിഴ് തായ് വാഴ്ത്തുകള് പാടി. പിന്നാലെ ഗവർണർ ആർ എൻ രവി ദേശീയ ഗാനം ആലപിക്കണമെന്ന് ആവശ്യപ്പെട്ടു. എന്നാല് സ്പീക്കറും മുഖ്യമന്ത്രിയും ഇതിന് തയ്യാറായില്ല.
നയപ്രഖ്യാപന പ്രസംഗം നടത്താതെ ഉടൻ തന്നെ ആർ എൻ രവി നിയമസഭ വിട്ടു. സർക്കാർ ദേശീയ ഗാനത്തെ അപമാനിച്ചുവെന്ന് കാട്ടി രാജ്ഭവൻ വിശദീകരണകുറിപ്പ് ഇറക്കി. സാധാരണ നിലയില് അവസാനമാണ് ദേശീയഗാനം ആലപിക്കാനുള്ളതെന്നും ഇത് അജണ്ടയില് കൃത്യമായി രേഖപ്പെടുത്തിയിട്ടുണ്ടെന്നും സർക്കാർ തിരിച്ചടിച്ചു.
TAGS : LATEST NEWS
SUMMARY : The National Anthem was not sung in the Assembly; The governor went down
