തിരുവനന്തപുരം: സോഷ്യൽ മീഡിയയിലൂടെയുള്ള വെളിപ്പെടുത്തലുകളുടെയും ആരോപണങ്ങളുടെയും അടിസ്ഥാനത്തിൽ രാഹുൽ മാങ്കൂട്ടത്തിലിനെ യൂത്ത് കോൺഗ്രസ് സംസ്ഥാന അധ്യക്ഷസ്ഥാനത്തുനിന്നടക്കം നീക്കിയേക്കുമെന്ന് റിപ്പോർട്ട്. ആരോപണങ്ങള് പുറത്ത് വരും മുന്പേ രാഹുലിനെതിരെ എഐസിസിക്ക് പരാതികള് കിട്ടിയിരുന്നതായാണ് വിവരം. മുതിർന്ന നേതാക്കളുമായി കൂടിയാലോചിച്ചശേഷം മാത്രമായിരിക്കും നടപടി എന്നാണ് അറിയുന്നത്.
പാർട്ടിയിലെ വനിതാ നേതാക്കളും രാഹുലിനെതിരെ സംസ്ഥാനത്തിന്റെ ചുമതലയുള്ള എഐസിസി ജനറൽ സെക്രട്ടറി ദീപാദാസ് മുൻഷിക്ക് പരാതി നൽകിയിട്ടുണ്ട്. ഇതിനെക്കുറിച്ച് അന്വേഷിക്കാൻ സംസ്ഥാനനേതൃത്വത്തോട് ദീപാദാസ് മുൻഷി ആവശ്യപ്പെട്ടിട്ടുണ്ട്. ഇതോടെയാണ് രാഹുലിനെതിരെ സംഘടനാതലത്തിൽ നടപടിയെടുക്കാനുള്ള വഴിതുറന്നത്. അധ്യക്ഷസ്ഥാനത്തുനിന്ന് മാറ്റാനുളള തീരുമാനമെടുക്കേണ്ടത് യൂത്ത് കോൺഗ്രസ് ദേശീയ നേതൃത്വമാണ്.
യുവ നേതാവിനെതിരെ മാധ്യമപ്രവര്ത്തക നടത്തിയ വെളിപ്പെടുത്തല് വ്യാപക ചര്ച്ചയ്ക്കാണ് വഴിവെച്ചിരിക്കുന്നത്. മാധ്യമപ്രവര്ത്തക ആരോപണം ഉന്നയിച്ചത് കോണ്ഗ്രസ് നേതാവും എംഎല്എയുമായ രാഹുല് മാങ്കൂട്ടത്തിലിനെതിരെയെന്നാണ് സോഷ്യല് മീഡിയയില് അടക്കം ചര്ച്ചയായിരിക്കുന്നത്. ഇതിനിടെ രാഹുല് മാങ്കൂട്ടത്തിലിനെതിരെ ഗുരുതര വെളിപ്പെടുത്തലുമായി രംഗത്തെത്തിയിരിക്കുകയാണ് എഴുത്തുകാരി ഹണി ഭാസ്കരന്. ‘രാഹുല് മാങ്കൂട്ടം-അനുഭവം’ എന്ന തലക്കെട്ടോടെ ഫേസ്ബുക്കില് പങ്കുവെച്ച കുറിപ്പിലായിരുന്നു ഹണി ഭാസ്കരന് തുറന്നെഴുതിയത്.
അതേസമയം യുവ നേതാവിനെതിരായ വെളിപ്പെടുത്തലില് കൂടുതല് പ്രതികരണവുമായി റിനി ആന് ജോര്ജ് രംഗത്തെത്തി. ആരോപണ വിധേയനായ ആളുടെ പേര് ഇപ്പോള് വെളിപ്പെടുത്തില്ലെന്നും പറഞ്ഞ കാര്യങ്ങളില് ഉറച്ച് നില്ക്കുന്നു എന്നും റിനി ആന് ജോര്ജ് പറഞ്ഞു. മാധ്യമശ്രദ്ധയ്ക്ക് വേണ്ടി ആരോപണം ഉന്നയിക്കുന്നതല്ല. എത്ര ആക്രമിച്ചാലും ഈ വ്യക്തി രക്ഷപ്പെടില്ല. എതിരെ നില്ക്കുന്നത് വന് ശക്തികളാണ്. ഇതൊന്നും ഒരു തിരഞ്ഞെടുപ്പ് ഗിമ്മിക്കല്ല. ആലോചിച്ച് മാത്രമേ തീരുമാനമെടുക്കൂ എന്നും റിനി പ്രതികരിച്ചു.
SUMMARY: Allegations against MLA in Rahul Mangkoota; Youth Congress may be removed from its state president post
