ഡൽഹി: വിമാനങ്ങളില്‍ പവർ ബാങ്ക് ഉപയോഗം നിരോധിച്ച്‌ ഡയറക്റ്ററേറ്റ് ജനറല്‍ ഓഫ് സിവില്‍ ഏവിയേഷൻ. വിമാനയാത്രയ്ക്കിടെ പവർ ബാങ്കുകള്‍ ഉപയോഗിച്ച്‌ മൊബൈല്‍ ഫോണുകളോ മറ്റ് ഇലക്‌ട്രോണിക് ഉപകരണങ്ങളോ ചർജ് ചെയ്യുന്നതും വിമാനത്തിനുള്ളിലെ ഇൻ – സീറ്റ് പവർ സപ്ലൈ സംവിധാനം ഉപയോഗിച്ച്‌ പവർ ബാങ്കുകള്‍ ചർജ് ചെയ്യുന്നതും ഇനിമുതല്‍ അനുവദിക്കില്ല.
വിമാനയാത്രക്കിടെ ലിഥിയം ബാറ്ററികള്‍ക്ക് തീപിടിക്കാനുള്ള സാധ്യതയും സുരക്ഷാ ഭീഷണികളും കണക്കിലെടുത്താണ് ഈ നിർണായക തീരുമാനമെന്ന് ഡിജിസിഎ വ്യക്തമാക്കി. പവർ ബാങ്കുകളും ബാറ്ററികളും യാത്രക്കാരുടെ കൈവശമുള്ള ബാഗുകളില്‍ സൂക്ഷിക്കാം. വിമാനങ്ങളിലെ ഓവർഹെഡ് ബിന്നുകളിലോ ചെക്ക്-ഇൻ ബാഗുകളിലോ വയ്ക്കുന്നത് ഒഴിവാക്കണമെന്നും നിർദേമുണ്ട്.
ലിഥിയം ബാറ്ററികളില്‍ തീപിടിച്ചാല്‍ അണയ്ക്കുക പ്രയാസമാണ്. കോർഗോ ഹോള്‍ഡില്‍ തീപിടിത്തമുണ്ടായാല്‍ അത് തിരിച്ചറിയാൻ വൈകുന്നത് ഗുരുതരമായ പ്രത്യാഘാതമുണ്ടാക്കുന്നതിനാലാണ് ഹാൻഡ് ബാഗുകള്‍ കാർഗോ ഹോള്‍ഡിലേക്ക് മാറ്റുന്നത് ഒഴിവാക്കുന്നത്.
ലിഥിയം ബാറ്ററികളുമായി ബന്ധപ്പെട്ട എല്ലാ അപകടങ്ങളും വിമാന കമ്പനികള്‍ ഉടൻ ഡിജിസിഎയെ അറിയിക്കണം. വിമാനത്തിനുള്ളിലെ പുതിയ നിയമങ്ങളെക്കുറിച്ച്‌ അനൗണ്‍സ്മെന്‍റുകള്‍ നടത്താനും വിമാനകമ്പനികള്‍ക്ക് നിർദേശം നല്‍കിയിട്ടുണ്ട്.
SUMMARY: Ban on using power banks on board aircraft
