കണ്ണൂർ: മുൻ മന്ത്രി വീണാ ജോർജിനെ കണ്ണൂർ റെയില്‍വേ സ്റ്റേഷനില്‍ കെഎസ്‌യു പ്രവർത്തകർ ആക്രമിച്ചെന്ന കേസില്‍ പരിയാരം ഗവ. മെഡിക്കല്‍ കോളജിലെ ഡോക്ടർമാരുടെ മൊഴി രേഖപ്പെടുത്തി അന്വേഷണസംഘം. കേസുമായി ബന്ധപ്പെട്ട് രൂപീകരിച്ച 13 അംഗ മെഡിക്കല്‍ ബോർഡിലെ അംഗങ്ങളായ ഡോക്ടർമാരില്‍ നിന്നാണ് പ്രത്യേക അന്വേഷണസംഘം വിവരങ്ങള്‍ ശേഖരിച്ചത്. സ്ഥലംമാറിപ്പോയ ഡോക്ടർമാരെ ഫോണില്‍ ബന്ധപ്പെട്ടും മൊഴിയെടുത്തു.
പരിശോധനയില്‍ പുറത്തുകാണത്തക്ക വിധത്തിലുള്ള പരുക്കുകളൊന്നും വീണ ജോർജിന് ഉണ്ടായിരുന്നില്ലെന്ന് ഡോക്ടർമാർ വ്യക്തമാക്കി. എങ്കിലും കഴുത്തില്‍ നീർക്കെട്ടും രണ്ട് നാഡികള്‍ തള്ളിയ നിലയിലും കണ്ടതിനെ തുടർന്നാണ് തീവ്രപരിചരണ വിഭാഗത്തില്‍ പ്രവേശിപ്പിച്ച്‌ കൂടുതല്‍ പരിശോധനകള്‍ നടത്തിയത്. തുടർന്ന് വീട്ടില്‍ പോകണമെന്ന് വീണ ജോർജ് തന്നെ ആവശ്യപ്പെട്ടതിനാലാണ് മെഡിക്കല്‍ കോളജില്‍ നിന്ന് ഡിസ്ചാർജ് ചെയ്തതെന്നും ഡോക്ടർമാർ മൊഴി നല്‍കി.
അതേസമയം, കേസില്‍ തെറ്റായ മൊഴി നല്‍കി അന്വേഷണം വഴിതിരിച്ചുവിടാൻ ശ്രമിച്ച വീണയുടെ മുൻ ഗണ്‍മാൻ അഭിലാഷിനെതിരെ നടപടി ശുപാർശ ചെയ്തുകൊണ്ട് എസ്.ഐ.ടി ഉടൻ ഡി.ജി.പിക്ക് റിപ്പോർട്ട് നല്‍കും. വ്യാജ മൊഴിയുടെ അടിസ്ഥാനത്തിലായിരുന്നു പോലീസ് കെ.എസ്.യു പ്രവർത്തകർക്കെതിരെ വധശ്രമം ഉള്‍പ്പെടെയുള്ള ജാമ്യമില്ലാ വകുപ്പുകള്‍ ചുമത്തി കേസ് രജിസ്റ്റർ ചെയ്തിരുന്നത്.
SUMMARY: Case involving the attack on Veena George; SIT records statements of doctors
