ബെംഗളൂരു: ലോകത്തിന്റെ വിവിധ ഭാഗങ്ങളിൽ നിന്ന് ശേഖരിച്ച പുരാതനവും അപൂർവവുമായ അമൂല്യ നാണയങ്ങളുടെ അതുല്യ ശേഖരത്തിലൂടെ ലോക റെക്കോർഡ് സ്വന്തമാക്കി മലയാളി യുവാവ്. പാലക്കാട് ഒറ്റപ്പാലം കണ്ണിയംപുറം ശ്രീറാം നഗർ കിഴനാട്ട് തൊടി ഹൗസിൽ കെ.ടി. സുധീഷ് ആണ് വേൾഡ് വൈഡ് ബുക്ക് ഓഫ് റെക്കോർഡ് സ്വന്തമാക്കിയത്. വിവിധ രാജ്യങ്ങളിൽ നിന്നുള്ള ഏറ്റവും വലിയ നാണയശേഖരം എന്ന വിഭാഗത്തിലാണ് സുധീഷിന്റെ നേട്ടം അംഗീകരിക്കപ്പെട്ടത്. 2025 മെയ് 6-ന് കർണാടകയിൽ നടന്ന ചടങ്ങിലാണ് റെക്കോർഡ് ഔദ്യോഗികമായി പ്രഖ്യാപിച്ചത്.
സുധീഷ് ശേഖരിച്ചിരിക്കുന്നത് ആകെ 1,499 നാണയങ്ങളാണ്. ഇവ 537 വ്യത്യസ്ത രാജ്യങ്ങൾ, ചരിത്രരാഷ്ട്രങ്ങൾ, രാഷ്ട്രീയ ഘടകങ്ങൾ എന്നിവയെ പ്രതിനിധീകരിക്കുന്നവയാണ്. നിലവിലുള്ള ഐക്യരാഷ്ട്രസഭാംഗ രാജ്യങ്ങളുടെ നാണയങ്ങൾക്കൊപ്പം ഇന്ന് നിലവിലില്ലാത്ത രാജ്യങ്ങൾ, ലയിച്ച രാജ്യങ്ങൾ, ഇല്ലാതായ രാഷ്ട്രങ്ങൾ, ദ്വീപുകൾ, വിദേശ അധീനപ്രദേശങ്ങൾ, സാമ്രാജ്യങ്ങൾ, സംസ്ഥാനങ്ങൾ , കോളനികൾ തുടങ്ങി വിവിധ കാലഘട്ടങ്ങളിലെയും പ്രദേശങ്ങളിലെയും നാണയങ്ങളും ശേഖരത്തിൽ ഉൾപ്പെട്ടിട്ടുണ്ട്.
വർഷങ്ങളുടെ അധ്വാനവും ഗവേഷണവും ലോകത്തിന്റെ വിവിധ ഭാഗങ്ങളിൽ നിന്ന് അപൂർവ നാണയങ്ങൾ കണ്ടെത്താനുള്ള നിരന്തര പരിശ്രമവുമാണ് ഈ നേട്ടത്തിന് പിന്നിലെന്ന് വേൾഡ് വൈഡ് ബുക്ക് ഓഫ് റെക്കോർഡിൻ്റെ വെബ്സൈറ്റിൽ പറയുന്നു. ഓരോ നാണയവും അതത് രാജ്യങ്ങളുടെയും സംസ്കാരത്തിന്റെയും ചരിത്രത്തിന്റെയും സാമൂഹിക പൈതൃകത്തിന്റെയും പ്രതീകമാണെന്നും, സുധീഷിന്റെ ശേഖരം മനുഷ്യചരിത്രത്തിന്റെ വൈവിധ്യം പ്രതിഫലിപ്പിക്കുന്ന അമൂല്യ സമാഹാരമാണെന്നും സംഘടന വിലയിരുത്തുന്നു.
നാണയങ്ങളുടെ ചരിത്രപരവും സാംസ്കാരികവുമായ പ്രാധാന്യം കൃത്യമായി രേഖപ്പെടുത്തി സംരക്ഷിച്ചിരിക്കുന്ന ഈ ശേഖരം ഭാവിതലമുറകൾക്കും ഗവേഷകർക്കും പ്രയോജനകരമാകുമെന്നും സംഘടന ചൂണ്ടിക്കാട്ടി. ലോകത്തിന്റെ വിവിധ ഭാഗങ്ങളിൽ നിന്നുള്ള അപൂർവ നാണയങ്ങളെ ഒരുമിച്ച് സംരക്ഷിച്ച ഈ നേട്ടത്തിലൂടെ നാണയശേഖരണ രംഗത്തെ ശ്രദ്ധേയ വ്യക്തിത്വമായി സുധീഷ് കെ.ടി. അന്തർദേശീയ അംഗീകാരം നേടിയിരിക്കുകയാണ്. ലോക റെക്കോർഡിലൂടെ ഇന്ത്യൻ നാണയശേഖരണ രംഗത്തിനും അഭിമാനകരമായ ഒരു നേട്ടമാണ് കൈവന്നിരിക്കുന്നതെന്നാണ് വിലയിരുത്തപ്പെടുന്നത്.
ചരിത്രത്തിന്റെയും നാണയശാസ്ത്രത്തിന്റെയും അമൂല്യ സാക്ഷ്യങ്ങളായ ഈ നാണയ ശേഖരം അന്താരാഷ്ട്ര തലത്തിൽ അംഗീകാരം നേടുകവഴി മലയാളി സമൂഹത്തിന് തന്നെ അഭിമാനമായി മാറിയിരിക്കുകയാണ് സുധീഷ് .കമ്മനഹള്ളിയിൽ യൂറിഡൈസ് ഇൻഷുറൻസ് അഡ്വൈസറി എന്ന സ്ഥാപനം നടത്തുന്ന സുധീഷ് ബെംഗളൂരു ആർ.ടി. നഗർ കനകനഗറിലാണ് താമസിക്കുന്നത്. കേരളസമാജം അടക്കമുള്ള മലയാളി സംഘടനകളിലും സജീവമാണ്.
