തിരുവനന്തപുരം: ബന്ദിപ്പൂർ വനമേഖലയിലൂടെയുള്ള ദേശീയപാതയിലെ രാത്രിയാത്രാ നിരോധനത്തിന് പരിഹാരം കാണാൻ ബദൽപാത നിർമിക്കുന്ന കാര്യം പരിഗണനയിലെന്ന് മുഖ്യമന്ത്രി വി.ഡി. സതീശൻ. പദ്ധതിയുമായി ബന്ധപ്പെട്ട് കർണാടക സർക്കാരുമായി പ്രാഥമിക ചർച്ചകൾ പൂർത്തിയാക്കിയതായും തുടർചർച്ചകളിലൂടെ ധാരണയിലെത്താൻ ശ്രമിക്കുമെന്നും അദ്ദേഹം നിയമസഭയിൽ വ്യക്തമാക്കി.
ബദൽപാതയുടെ രൂപം സംബന്ധിച്ച് വിശദമായ പദ്ധതിരേഖ (ഡിപിആർ) തയ്യാറാക്കേണ്ടതുണ്ട്. വന്യജീവികളുടെ സ്വാഭാവിക സഞ്ചാരത്തിന് തടസ്സമുണ്ടാകാത്ത വിധത്തിൽ തുരങ്കം നിർമിക്കുകയോ മൃഗങ്ങൾക്ക് തടസ്സമില്ലാതെ കടന്നുപോകാൻ കഴിയുന്ന രീതിയിൽ പാത ഒരുക്കുകയോ ചെയ്യുന്നതുൾപ്പെടെയുള്ള സാധ്യതകൾ പരിശോധിക്കേണ്ടതുണ്ടെന്നും മുഖ്യമന്ത്രി പറഞ്ഞു.
ഡിപിആർ തയ്യാറാക്കി സമർപ്പിക്കുന്നതിന് മുമ്പ് കർണാടക സർക്കാരുമായി ചർച്ച നടത്തി ധാരണയിലെത്തുകയാണ് ലക്ഷ്യം. ഇക്കാര്യത്തിൽ കർണാടക മുഖ്യമന്ത്രിയുമായി ആദ്യഘട്ടത്തിൽ സംസാരിച്ചിട്ടുണ്ടെന്നും തുടർകൂടിയാലോചനകൾ നടത്താൻ അദ്ദേഹം സന്നദ്ധത അറിയിച്ചിട്ടുണ്ടെന്നും വി.ഡി. സതീശൻ പറഞ്ഞു.
പ്രിയങ്ക ഗാന്ധി എംപിയും വിഷയത്തിൽ ഇടപെട്ടിട്ടുണ്ട്. കർണാടക സർക്കാരുമായുള്ള ചർച്ചകൾക്കായി ബെംഗളൂരുവിലെത്താൻ അവർ സന്നദ്ധത അറിയിച്ചതായും മുഖ്യമന്ത്രി നിയമസഭയിൽ അറിയിച്ചു.
2009 മുതൽ തുടരുന്ന യാത്രാനിരോധനം
ബന്ദിപ്പൂർ ദേശീയോദ്യാനത്തിലൂടെയും കടുവാ സങ്കേതത്തിലൂടെയും കടന്നുപോകുന്ന ദേശീയപാതകളിൽ വന്യജീവികളുടെ സംരക്ഷണം മുൻനിർത്തിയാണ് രാത്രിയാത്രാ നിയന്ത്രണം ഏർപ്പെടുത്തിയത്. 2009ൽ രാത്രി ഒൻപത് മുതൽ പുലർച്ചെ ആറുവരെ വാഹനഗതാഗതം നിരോധിച്ച തീരുമാനം പിന്നീട് പിൻവലിച്ചെങ്കിലും ഹൈക്കോടതി സ്റ്റേ ചെയ്തതോടെ നിയന്ത്രണം തുടരുകയായിരുന്നു.
രാത്രിയാത്രാ നിരോധനത്തിന് ബദൽ സംവിധാനം നിർദേശിക്കാനാണ് നിലവിൽ കോടതി ആവശ്യപ്പെട്ടിരിക്കുന്നത്. വന്യജീവികളുടെ സംരക്ഷണം ഉറപ്പാക്കുന്നതിനൊപ്പം യാത്രക്കാർ നേരിടുന്ന ബുദ്ധിമുട്ടുകൾക്കും പരിഹാരം കാണുന്ന രീതിയിൽ പദ്ധതി രൂപപ്പെടുത്താനാണ് സർക്കാർ ലക്ഷ്യമിടുന്നത്.
