ബെംഗളൂരു: പരസ്പര സ്നേഹവും സാഹോദര്യവും വളർത്തുന്നതിൽ ഭാഷക്ക് സുപ്രധാനമായ പങ്കുണ്ടെന്ന് കര്ണാടക നിയമസഭാ സ്പീക്കർ യു. ടി ഖാദർ. കര്ണാടക സർക്കാർ കന്നഡ വികസന അതോറിറ്റിയും മലയാളം മിഷനും സംയുക്തമായി നടത്തുന്ന കന്നഡ പഠന പദ്ധതിയുടെ ഉദ്ഘാടനം നിര്വഹിച്ചു സംസാരിക്കുകയായിരുന്നു അദ്ദേഹം. കര്ണാടകയിൽ താമസിക്കുന്ന മറ്റു ഭാഷകൾ സംസാരിക്കുന്നവർ കന്നഡ തീർച്ചയായും പഠിച്ചിരിക്കണം. കന്നഡ ഭാഷ മറ്റു ഭാഷകളെ ഉൾക്കൊള്ളുകയും അവയിൽ നിന്ന് പല വാക്കുകളും കടമെടുക്കുകയും ചെയ്തിട്ടുണ്ട്. ചിട്ടയായ പാഠ്യപദ്ധതിയിലൂടെയാണ് കന്നഡ വികസന അതോറിറ്റി കന്നഡ ക്ലാസ്സുകൾ സംഘടിപ്പിക്കുന്നത്. മലയാളം മിഷൻ ഈ ദൗത്യം ഏറ്റെടുക്കുന്നതിൽ അതിയായ സന്തോഷമുണ്ടെന്നും അദ്ദേഹം പറഞ്ഞു.
വിധാന് സൗധയില് നടന്ന ചടങ്ങില് പിന്നോക്ക വിഭാഗ വികസന, സാംസ്കാരിക വകുപ്പ് മന്ത്രി ശിവരാജ തംഗഡഗി, കേന്ദ്ര സാഹിത്യ അക്കാദമി ജേതാവും വിവർത്തകനുമായ സുധാകരൻ രാമന്തളി എന്നിവർ മുഖ്യാതിഥികളായിരുന്നു. കന്നഡ വികസന അതോറിറ്റി ചെയർമാൻ പുരുഷോത്തമ ബിളിമലെ അധ്യക്ഷത വഹിച്ചു. കന്നഡ പാഠ്യപദ്ധതിയെ കുറിച്ച് അദ്ദേഹം വിശദീകരിച്ചു.
കന്നഡ വികസന അതോറിറ്റി സെക്രട്ടറി ഡോ. സന്തോഷ് ഹങ്കാൽ, മലയാളം മിഷൻ കര്ണാടക ചാപ്റ്റർ കൺവീനർ ടോമി ആലുങ്കൽ, പ്രസിഡൻ്റ് കെ. ദാമോദരൻ, ലോക കേരള സഭാംഗങ്ങളായ നൗഷാദ്. കെ, എൽദോ ബേബി എന്നിവർ സംസാരിച്ചു. കന്നഡ പാഠ്യപദ്ധതി കോർഡിനേറ്റർ ജീവൻ രാജൻ, അഡ്വ. ബുഷ്റ വളപ്പിൽ എന്നിവർ നേതൃത്വം നൽകി. ബെംഗളൂരുവിലെ വിവിധ മലയാളി സംഘടനാ ഭാരവാഹികളും പങ്കെടുത്തു.
സംസ്ഥാനത്തെ മലയാളം മിഷന് പഠന കേന്ദ്രങ്ങളിലും മറ്റു മലയാളി കൂട്ടായ്മകളിലുമായി ഓഗസ്റ്റ് 15 മുതൽ 20 കേന്ദ്രങ്ങളിലാണ് ക്ലാസുകൾ ആരംഭിക്കുന്നത്. മൂന്നു മാസം നീളുന്ന ലഘു പാഠ്യപദ്ധതി കന്നഡ വികസന അതോറിറ്റിയാണ് രൂപപെടുത്തിയിരിക്കുന്നത്. 35 ല് കുറയാത്ത പഠിതാക്കളും 3 കോര്ഡിനേറ്റര്മാരും, പഠന കേന്ദ്രവുമുള്ള സംഘടനകള്ക്ക് ക്ലാസ്സുകള് നടത്താവുന്നതാണ്. കൂടുതല് വിവരങ്ങള്ക്ക്: 9739200919, 9379913940.
<br>
TAGS : MALAYALAM MISSION
SUMMARY : Malayalam Mission-Kannada Development Authority Kannada study program
