തിരുവനന്തപുരം: സ്ത്രീകള്ക്ക് സൗജന്യ യാത്ര എന്ന പ്രഖ്യാപനത്തിന് പിന്നാലെ പുതിയ നീക്കവുമായി കെഎസ്ആർടിസി. ജെൻഡർ ടിക്കറ്റിങ് നടപ്പാക്കുന്നതിന്റെ ഭാഗമായി കണക്കെടുപ്പ് തുടങ്ങി. യാത്രക്കാരുടെ ജെൻഡർ രേഖപ്പെടുത്താനാണ് കെഎസ്ആർടിസിക്ക് നിർദേശം. കെഎസ്ആർടിസിയില് സൗജന്യ യാത്ര എന്ന കോണ്ഗ്രസ് പ്രഖ്യാപനത്തിന് പിന്നാലെയാണ് നടപടി.
കണക്കെടുക്കുന്നതിനായി ടിക്കറ്റ് മെഷീനില് പുതിയതായി ഒരു ഓപ്ഷൻ നല്കിയിട്ടുണ്ട്. ഇതിലൂടെ ടിക്കറ്റ് എടുക്കുമ്പോള് തന്നെ സ്ത്രീയാണോ പുരുഷനാണോ എന്ന് രേഖപ്പെടുത്താൻ സാധിക്കും. കെഎസ്ആർടിസിയില് യാത്ര ചെയ്യുന്ന സ്ത്രീകളുടെ എണ്ണം ഈ ടിക്കറ്റിങ്ങിലൂടെ മനസിലാക്കാൻ സാധിക്കും. ഇത്തരത്തില് കെഎസ്ആർടിസി പ്രതിദിന സ്ത്രീ യാത്രക്കാരുടെ കണക്ക് എടുക്കുന്നുണ്ട്. ഈ കണക്കെടുക്കുന്നതിലൂടെ കൃത്യമായ പദ്ധതി രൂപീകരിക്കാൻ കോണ്ഗ്രസിന് സാധിക്കും.
പ്രത്യേക പാക്കേജ് അനുവദിക്കുന്നതിനും, ഇതിനുവേണ്ടി എത്ര പണം ചെലവഴിക്കണമെന്നുമുള്ള തുടങ്ങിയ കാര്യങ്ങള് ഇതിലൂടെ മനസിലാക്കാനായേക്കും. ഇന്ദിരാ ഗ്യാരന്റി എന്ന പേരില് കോണ്ഗ്രസ് അവതരിപ്പിച്ച അഞ്ച് ഗ്യാരണ്ടികളില് ഒന്നായിരുന്നു സ്ത്രീകള്ക്ക് കെഎസ്ആർടിസിയിലെ സൗജന്യ യാത്ര. യുഡിഎഫ് ഭരണം ഉറപ്പിച്ചതിനു തൊട്ടു പിന്നാലെ നിരവധി സ്ത്രീകളാണ് കെഎസ്ആർടിസിയില് സൗജന്യമായി യാത്ര ചെയ്യുന്നതിനെക്കുറിച്ചുള്ള പോസ്റ്റുകള് സമൂഹമാധ്യമങ്ങളില് പങ്കുവച്ചത്.
SUMMARY: Free travel for women: KSRTC begins steps for ‘Indira Guarantee’ scheme
