ഐപിഎല്ലിൽ മുംബൈ ഇന്ത്യൻസ് പ്ലേ ഓഫ് സ്വപ്നം സാധ്യമാക്കി. നിർണായക മത്സരത്തിൽ ഡൽഹിയെ തകർത്താണ് മുംബൈ പ്ലേ ഓഫ് ബർത്ത് ഉറപ്പിച്ചത്. 59 റൺസിനാണ് മുംബൈയുടെ ജയം. മുംബൈ ഉയർത്തിയ 181 റൺസ് വിജയലക്ഷ്യത്തിലേക്ക് ബാറ്റേന്തിയ ഡൽഹി 121 റൺസിന് പുറത്തായി. വാങ്കഡെയിൽ മുംബൈ ബൗളർമാർക്ക് മുന്നിൽ ഡൽഹിക്ക് പിടിച്ചുനിൽക്കാനായില്ല. മത്സരത്തിൽ പരാജയപ്പെട്ടതോടെ ഡൽഹി പ്ലേ ഓഫ് കാണാതെ പുറത്തായി.
മറുപടി ബാറ്റിങ്ങിനിറങ്ങിയ ഡൽഹിക്ക് തുടക്കത്തിൽ തന്നെ തിരിച്ചടിയേറ്റു. 27 റൺസിനിടെ ടീമിന് മൂന്ന് മുൻനിര ബാറ്റർമാരെ നഷ്ടമായി. നായകൻ ഫാഫ് ഡു പ്ലെസിസ്(6), കെ.എൽ. രാഹുൽ (11), അഭിഷേക് പോറൽ(6) എന്നിവർ വേഗം കൂടാരം കയറി. തുടക്കത്തിൽ തന്നെ പ്രതിരോധത്തിലായെങ്കിലും സമീർ റിസ്വിയും വിപ്രജ് നിഗവും പ്രതിരോധത്തിന് ശ്രമിച്ചു. സ്കോർ 55 ൽ നിൽക്കേ വിപ്രജ് നിഗം(20) പുറത്തായി. പിന്നാലെ ട്രിസ്റ്റൺ സ്റ്റബ്സും(2) കൂടാരം കയറിയതോടെ ഡൽഹിയുടെ പരാജയം ഉറപ്പായിരുന്നു.
അശുതോഷ് ശർമ(18), മാധവ് തിവാരി(3), കുൽദീപ് യാദവ്(7) എന്നിവർക്കും ടീമിനെ വിജയത്തിലെത്തിക്കാനായില്ല. ഒടുവിൽ 18.2 ഓവറിൽ 121 റൺസിന് ഡൽഹി പുറത്തായി. മുംബൈക്കായി ജസ്പ്രീത് ബുംറയും മിച്ചൽ സാന്റ്നറും മൂന്നുവീതം വിക്കറ്റെടുത്തു. മുംബൈക്കായി സൂര്യകുമാർ 43 പന്തിൽ നിന്ന് ഏഴ് ഫോറുകളുടെയും നാല് സിക്സറുകളുടെയും അകമ്പടിയോടെ 73 റൺസെടുത്തു. നമാൻ ധിർ എട്ട് പന്തിൽ നിന്ന് 24 റൺസെടുത്തു.
TAGS: SPORTS | IPL
SUMMARY: Mumbai Indians secures Play off in IPL
