ബെംഗളൂരു: മുൻ ഹോക്കി താരം എം എം സോമയ്യയുടെ മോഷണം പോയ ഒളിമ്പിക്‌സ്‌ സ്വർണമടക്കമുള്ള മെഡലുകൾ തിരിച്ചുകിട്ടി. മോഷണം നടത്തിയ പ്രതികളെ ഇന്ദിരാനഗർ പോലീസ് പിടികൂടി. മാണിക്യ എന്ന മാണിക്കന്തൻ (31), ഭരത് എന്ന ഡാർലി (25) എന്നിവരാണ് അറസ്റ്റിലായത്.
ന്യൂ തിപ്പസാന്ദ്രയിലെ വീട്ടിൽ നിന്ന് ഒക്ടോബർ 28 നാണ്‌ മെഡലുകൾ മോഷണം പോയത്‌. സോമയ്യയും കുടുംബവും കുടഗിൽ പോയ അവസരത്തിലായിരുന്നു മോഷണം. അന്നേ ദിവസം രാവിലെ 7.15-ഓടെ അയൽവാസിയായ നാരായണൻ, വീടിന്റെ മുൻവശത്തെ വാതിൽ തുറന്നുകിടക്കുന്നത് കണ്ട് സോമയയെ വിവരമറിയിക്കുകയായിരുന്നു.തുടർന്ന് അയൽവാസിയുടെ സി.സി.ടി.വി ദൃശ്യങ്ങൾ പരിശോധിച്ചപ്പോഴാണ് ഒക്ടോബർ 28 പുലർച്ചെ 2.34-ന് രണ്ട് പേർ വാതിൽ തകർത്ത് അകത്തേക്ക് പ്രവേശിക്കുന്നത് വ്യക്തമായത്.
1980-ലെ മോസ്കോ ഒളിമ്പിക്സിലെ സ്വർണ്ണ മെഡൽ (പുരുഷ ഹോക്കിയിൽ ഇന്ത്യയ്ക്ക് ലഭിച്ച അവസാന ഒളിമ്പിക് സ്വർണ്ണം), 1982 ഏഷ്യൻ ഗെയിംസിലെ വെള്ളി മെഡൽ, 1986 ഏഷ്യൻ ഗെയിംസിലെ വെങ്കല മെഡൽ, 1982 ആംസ്റ്റർഡാം ചാമ്പ്യൻസ് ട്രോഫിയിലെ വെങ്കല മെഡൽ എന്നിവയുൾപ്പെടെ ആകെ 8 മെഡലുകളാണ് പോലീസ് വീണ്ടെടുത്തത്. മെഡലുകൾക്ക് പുറമെ മോഷണം പോയ ഒളിമ്പിക് കിറ്റ് ബാഗ്, കാമറ, കുടകിലെ പരമ്പരാഗത കത്തി (Kodava dagger) എന്നിവയും പ്രതികളിൽ നിന്ന് കണ്ടെടുത്തിട്ടുണ്ട്.
നവംബർ ഒമ്പതിന്‌ രാമനഗരയിൽ നിന്നാണ്‌ പ്രതികൾ പിടിയിലായത്‌. വിശദമായ ചോദ്യം ചെയ്യലിൽ സോമയ്യയുടെ വീട്ടിലെ മോഷണം ഏറ്റുപറഞ്ഞു. മുഖ്യപ്രതിയായ മാണിക്യ കർണാടകയിലും തമിഴ്നാട്ടിലുമായി നിരവധി ക്രിമിനൽ കേസുകളിൽ പ്രതിയാണ്. ഭരത് കൊലപാതക-മോഷണ കേസുകളിലും ഉൾപ്പെട്ടിട്ടുണ്ടെന്ന് പോലീസ് അറിയിച്ചു. തുടർന്ന് നടത്തിയ ചോദ്യംചെയ്യലിലാണ് പ്രതികൾ കുറ്റം സമ്മതിച്ചത്. കേസിൽ ഉൾപ്പെട്ട ഒളിവിലുള്ള മറ്റൊരു പ്രതിക്കായുള്ള തിരച്ചിൽ പോലീസ് ഊർജ്ജിതമാക്കിയിട്ടുണ്ട്.
SUMMARY: Police have recovered the stolen medals of hockey legend M. M. Somayya; two people have been arrested.
