ബെംഗളൂരു: ചലച്ചിത്രശാഖയെ മാത്രമല്ല, സമൂഹത്തെ ഒന്നടങ്കം നിരന്തരം ചലിപ്പിച്ചുകൊണ്ടിരിക്കുന്ന ശക്തമായ സാന്നിധ്യമായി എന്നും നിലനിൽക്കുന്നു എന്നതാണ് എം. ടി.യുടെ സിനിമകളെ എക്കാലത്തും പ്രസക്തമാക്കുന്നതെന്ന് റൈറ്റേഴ്സ് ഫോറം ജനറൽ സെക്രട്ടറി ശാന്തകുമാർ എലപ്പുള്ളി പഞ്ഞു. തിപ്പസാന്ദ്ര ഫ്രണ്ട്സ് അസോസിയേഷൻ സംഘടിപ്പിച്ച പ്രതിമാസ സെമിനാറിൽ ‘കഥാപാത്രങ്ങളും സമൂഹവും എം. ടി. സിനിമകളിൽ’ എന്ന വിഷയത്തിൽ സംസാരിക്കുകയായിരുന്നു ശാന്തകുമാർ.
സർഗ്ഗാത്മകസാഹിത്യത്തിന്റെ തിളക്കവും ആഴത്തിലുള്ള സാമൂഹികബന്ധവും സമന്വയിപ്പിച്ച എം. ടി.യുടെ സിനിമകൾ, ഒരു വ്യക്തിയുടെ ദുരന്തം ആ സമൂഹത്തിന്റെ തന്നെ പ്രതിഫലനമാകുന്നത് എങ്ങനെയെന്ന് നമ്മെ ഓർമ്മിപ്പിക്കുകയും ചെയ്യുന്നുവെന്നും അദ്ദേഹം പറഞ്ഞു
തുടർന്ന് നടന്ന ചർച്ച ഷീജ ഷാജി ഉദ്ഘാടനം ചെയ്തു. എം. ടി. വാസുദേവൻ നായരുടെ സിനിമകളിൽ കഥാപാത്രങ്ങളും അവർ ജീവിക്കുന്ന സമൂഹവും തമ്മിൽ ആഴത്തിലുള്ള ബന്ധമുണ്ടെന്നും മനുഷ്യരുടെ പ്രവൃത്തികൾക്കൊപ്പം അവരുടെ സാഹചര്യങ്ങളും മനസ്സിലാക്കാൻ എം. ടി.യുടെ സിനിമകൾ നമ്മെ പഠിപ്പിക്കുന്നുവെന്നും ഷീബ ഷാജി പറഞ്ഞു.
പി മോഹൻദാസ് അധ്യക്ഷത വഹിച്ചു. ചർച്ചയിൽ ബി .എസ്. ഉണ്ണികൃഷ്ണൻ, സി. കുഞ്ഞപ്പൻ, ദിവാകര മേനോൻ, രവിശങ്കർ, ആർ. വി. പിള്ള, ശ്രീകണ്ഠൻ നായർ, കല്പന പ്രദീപ്. സംസാരിച്ചു. പ്രദീപ്. പി പി നന്ദി പറഞ്ഞു.
