തുമക്കൂരു: കർണാടകയിൽ കാമുകന്റെ സഹായത്തോടെ യുവതി ഭർത്താവിനെ കൊലപ്പെടുത്തി. ശങ്കരമൂർത്തി(50) ആണ് കൊല്ലപ്പെട്ടത്. ഭാര്യ സുമംഗല, കാമുകൻ നാഗരാജു എന്നിവരെ പൊലീസ് അറസ്റ്റ് ചെയ്തു. തുമക്കൂരുവിലെ കാടഷെട്ടിഹള്ളിയിലാണ് സംഭവം. ജൂൺ 24ന് രാത്രിയാണ് കൊലപാതകം നടന്നത്. വീട്ടിലേക്ക് നാഗരാജുവിനെ വിളിച്ചു വരുത്തിയ സുമംഗല ശങ്കരമൂർത്തിയുടെ കണ്ണുകളിലേക്ക് മുളക്പൊടി വിതറി. തടികഷണം കൊണ്ട് മർദിച്ച് അവശനാക്കി. പിന്നാലെ കഴുത്ത് ഞെരിച്ചു കൊല്ലുകയായിരുന്നു.
തുടർന്ന് മൃതദേഹം ചാക്കിലാക്കി 30 കിലോമീറ്റർ അകലെയുള്ള കൃഷിയിടത്തിലെ കിണറിൽ തള്ളി. മൂർത്തിയെ കാണാനില്ലെന്ന് പൊലീസിനു പരാതി ലഭിച്ചിരുന്നു. കിണറിൽ നിന്നു മൃതദേഹം ലഭിച്ചതോടെ കാണാതായവരെ കേന്ദ്രീകരിച്ച് പൊലീസ് നടത്തിയ അന്വേഷണമാണ് ഇരുവരെയും കുരുക്കിയത്.
പ്രദേശത്തെ കോളജിലെ പാചകക്കാരിയായി ജോലി ചെയ്തിരുന്ന സുമംഗല നാഗരാജുവുമായി അടുപ്പത്തിലായിരുന്നു. ബന്ധത്തിനു ശങ്കരമൂർത്തി തടസ്സമായതോടെയാണ് കൊലപ്പെടുത്താൻ തീരുമാനിച്ചതെന്നാണ് വിവരം. ഇവർ കുറ്റസമ്മതം നടത്തി.
SUMMARY: Woman kills husband with lover’s help using chilli powder in Tumakuru
