ബെംഗളൂരു: ഉത്തരാഖണ്ഡിലെ ചമോലിയിൽ ബെംഗളൂരു സ്വദേശിനിയുടെ മൃതദേഹം കാറിനുള്ളിൽ കത്തിക്കരിഞ്ഞ നിലയിൽ കണ്ടെത്തി. ഞായറാഴ്ച രാവിലെയാണ് മൃതദേഹം കണ്ടത്. ശ്വേത സേനാപതിയാണ് (40) മരിച്ചത്. ബന്ധുവായ സന്തോഷ് കുമാർ സേനാപതിക്കും, മറ്റൊരാൾക്കുമൊപ്പം ചമോലിയിലെ ഹോം സ്റ്റേയിൽ താമസിക്കുകയായിരുന്നു. കൊലപാതകമാണെന്നാണ് പോലീസിന്റെ പ്രാഥമിക നിഗമനം.
ശ്വേതയെ കൊലപ്പെടുത്തിയ ശേഷം തെളിവുകൾ നശിപ്പിക്കാൻ മൃതദേഹം കത്തിച്ചതായിരിക്കാമെന്ന് പോലീസ് പറഞ്ഞു. കാറിനടുത്ത് നിന്ന് വിഷക്കുപ്പിയും പോലീസ് കണ്ടെത്തിയിട്ടുണ്ട്. മൂന്ന് മാസത്തിലേറെയായി ശ്വേതയും മറ്റു രണ്ട് പേരും ഹോംസ്റ്റേയിൽ താമസിച്ചുവരികയായിരുന്നു. ഇതിനിടെയാണ് കഴിഞ്ഞ ദിവസം യുവതിയെ കാണാതായത്.
തുടർന്ന് സന്തോഷ് പോലീസിൽ പരാതി നൽകുകയായിരുന്നു. ഇവർക്കൊപ്പമുണ്ടായിരുന്ന മറ്റൊരാളെ കാണാതായതായി ചമോലി പോലീസ് സൂപ്രണ്ട് (എസ്പി) സർവേഷ് പൻവാർ പറഞ്ഞു. ഇയാളുടെ ഫോൺ നമ്പർ സ്വിച്ച് ഓഫ് ആണ്. കേസന്വേഷിക്കാൻ ഒന്നിലധികം ടീമുകളെ രൂപീകരിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു.
TAGS: MURDER | BENGALURU
SUMMARY: Bengaluru woman, 40, living in Chamoli homestay found murdered in burnt car
