ഐപിഎല്ലില് റോയല് ചലഞ്ചേഴ്സ് ബെംഗളൂരുവിനെതിരെ അനായാസ ജയവുമായി മുംബൈ ഇന്ത്യന്സ്. ബെംഗളൂരു ഉയർത്തിയ 197 റണ്സ് വിജയലക്ഷ്യം 15.3 ഓവറില് മുംബൈ മറികടന്നു. ഇഷാന് കിഷന് (34 പന്തില് 69), സൂര്യകുമാർ യാദവ് (19 പന്തില് 52), രോഹിത് ശർമ (24 പന്തില് 38) എന്നിവരുടെ ഇന്നിങ്സാണ് മുംബൈയുടെ ജയം വേഗത്തിലാക്കിയത്.
മുംബൈയുടെ തുടർച്ചയായ രണ്ടാം ജയമാണിത്. ബെംഗളൂരുവിന്റെ അഞ്ചാം തോല്വിയും. രോഹിതും-ഇഷാനും സ്വപ്നതുല്യമായ തുടക്കമായിരുന്നു മുംബൈയ്ക്ക് സമ്മാനിച്ചത്. റീസെ ടോപ്ലി, മുഹമ്മദ് സിറാജ്, ആകാശ് ദീപ്, ഗ്ലെന് മാക്സ്വെല് തുടങ്ങി പന്തെറിഞ്ഞവരെല്ലാം പലകുറി ബൗണ്ടറി ലൈന് കടന്നു. പവർപ്ലെയ്ക്കുള്ളില് തന്നെ 23 പന്തുകളില് നിന്ന് ഇഷാന് അർധ സെഞ്ചുറിയും കുറിച്ചു. 72 റണ്സായിരുന്നു ആദ്യ ഓവറുകളില് മുംബൈ ബാറ്റർമാർ അടിച്ചുകൂട്ടിയത്. രോഹിതിന്റെ സംഭാവന 15 റണ്സ് മാത്രമായിരുന്നു.
പവർപ്ലെയ്ക്ക് ശേഷവും 8.3 ഓവറില് മുംബൈയുടെ സ്കോർ മൂന്നക്കം തൊട്ടു. തൊട്ടുപിന്നാലെ തന്നെ ആകാശ് ദീപിന് വിക്കറ്റ് സമ്മാനിച്ച് ഇഷാന് കളം വിട്ടു. 34 പന്തില് 69 റണ്സായിരുന്നു ഇടം കയ്യന് ബാറ്ററുടെ സമ്പാദ്യം. ഇഷാന് അവാസാനിപ്പിച്ചിടത്ത് നിന്ന് സൂര്യകുമാറും രോഹിതും തുടർന്നു. ആകാശ് ദീപെറിഞ്ഞ 11-ാംഓവറില് മൂന്ന് സിക്സും ഒരു ഫോറും ഉള്പ്പെടെ 26 റണ്സായിരുന്നു സൂര്യകുമാർ നേടിയത്.
24 പന്തില് മൂന്ന് വീതം ഫോറും സിക്സും ഉള്പ്പെടെ 38 റണ്സെടുത്ത് രോഹിത് മടങ്ങിയെങ്കിലും റണ്ണൊഴുക്ക് തുടർന്നു. ടോപ്ലിയുടെ 13-ാം ഓവറില് 18 റണ്സും നേടി സൂര്യ അർധ ശതകം തികച്ചു. 17 പന്തിലായിരുന്നു നേട്ടം. വൈകാതെ സൂര്യയുടെ ഇന്നിങ്സ് വൈശാഖിന്റെ പന്തില് ലോംറോറിന്റെ കൈകളിലവസാനിച്ചു. അഞ്ച് ഫോറും നാല് സിക്സുമാണ് ഇന്നിങ്സില് ഉള്പ്പെട്ടത്. പിന്നീട് ഹാർദിക്ക് പാണ്ഡ്യയും (ആറ് പന്തില് 21), തിലക് വർമയും (16) അനായാസം മുംബൈയെ വിജയത്തിലെത്തിച്ചു.
The post ഐപിഎൽ 2024; ബെംഗളൂരുവിനെതിരെ അനായാസ ജയവുമായി മുംബൈ appeared first on News Bengaluru.
Powered by WPeMatico
