ബെംഗളൂരു: ട്രാവലർ വാനും ലോറിയും കൂട്ടിയിടിച്ചുണ്ടായ അപകടത്തിൽ മൂന്ന് പേർ മരിച്ചു. കലബുറഗി അഫ്‌സൽപുർ താലൂക്കിൽ സോലാപൂർ-കലബുർഗി ദേശീയ പാതയിലാണ് അപകടമുണ്ടായത്. വാനിലുണ്ടായിരുന്ന രണ്ട് തീർഥാടകരും മറ്റൊരു സ്കൂട്ടർ യാത്രക്കാരനുമാണ് സംഭവസ്ഥലത്ത് വെച്ച് തന്നെ മരിച്ചത്. കലബുർഗിയിലെ സ്റ്റേഷൻ ബസാറിൽ നിന്നുള്ള അനൂപ് മാധവ് (29), മൈസൂരുവിൽ നിന്നുള്ള വിനിത കശ്യപ് (54), ഗൊബ്ബൂർ സ്വദേശിയായ ബസവരാജ് (33) എന്നിവരാണ് മരിച്ചത്.
വാനിലുണ്ടായിരുന്നവർ ബുധനാഴ്ച വൈകിട്ട് ദേവൽ ഗണഗാപുർ ഗ്രാമത്തിൽ നിന്ന് കലബുർഗിയിലെ ദത്താത്രേയ ക്ഷേത്രം സന്ദർശിച്ച് മടങ്ങുകയായിരുന്നു. മുമ്പിലുണ്ടായിരുന്ന വാഹനത്തെ മറികടക്കാൻ ശ്രമിച്ച വാൻ നിയന്ത്രണം വിട്ട് കരിമ്പ് നിറച്ച ലോറിയുമായി കൂട്ടിയിടിച്ചാണ് അപകടമുണ്ടായത്. ഇതിനിടെ ഇരുവാഹനങ്ങളുടെയും പുറകിലായിരുന്ന സ്കൂട്ടർ വാനിലേക്ക് ഇടിക്കുകയായിരുന്നു. രണ്ട് വാഹനങ്ങളുടെയും ഡ്രൈവർമാർ സംഭവസ്ഥലത്ത് നിന്ന് ഓടി രക്ഷപ്പെട്ടു. സംഭവത്തിൽ പോലീസ് കേസെടുത്തു.
TAGS: KARNATAKA | ACCIDENT
SUMMARY: Three pilgrims dies after van Hits with lorry
