ബെംഗളൂരു: കൈരളി കലാസമിതിയുടെ ആഭിമുഖ്യത്തിൽ സംഘടിപ്പിക്കുന്ന ‘സാഹിത്യോത്സവം 2026’ ജൂലൈ 12-ന് ബെംഗളൂരുവിൽ നടക്കും. സാഹിത്യ-സാംസ്കാരിക മേഖലകളിലെ പ്രമുഖരുടെ സാന്നിധ്യത്തിൽ വിവിധ പരിപാടികളോടെയാണ് ദിനം മുഴുവൻ നീളുന്ന സാഹിത്യോത്സവം സംഘടിപ്പിക്കുന്നത്.
രാവിലെ 10 മണിക്ക് ആരംഭിക്കുന്ന സാഹിത്യ സമ്മേളനം പ്രശസ്ത എഴുത്തുകാരി സാറാ ജോസഫ് ഉദ്ഘാടനം ചെയ്യും. കൈരളി കലാസമിതി പ്രസിഡന്റ് സുധാകരൻ രാമന്തളി അധ്യക്ഷത വഹിക്കും. വിഷ്ണുമംഗലം കുമാർ, ഡെന്നിസ് പോൾ, സതീഷ് തോട്ടശ്ശേരി, അജിത് കോടോത്ത് എന്നിവർ ആശംസകൾ അർപ്പിക്കും. തുടർന്ന് എഴുത്തുകാരൻ സുഭാഷ് ചന്ദ്രൻ ‘എഴുത്ത് സൃഷ്ടിക്കുന്ന സംസ്കാരം’ എന്ന വിഷയത്തിൽ പ്രഭാഷണം നടത്തും. 13-ാം വയസ്സിൽ 11 പുസ്തകങ്ങൾ രചിച്ച ബാലസാഹിത്യകാരൻ ഓസ്റ്റിൻ അജിത്തിനെ ചടങ്ങിൽ ആദരിക്കും. തുടർന്ന് റഫീഖ് അഹമ്മദ് ‘മലയാള കവിതയുടെ വർത്തമാനം’ എന്ന വിഷയത്തിൽ സംസാരിക്കും. ബെംഗളൂരുവിലെ കവികളെ പങ്കെടുപ്പിച്ചുള്ള കവിയരങ്ങും നടക്കും.
ശുഭ ദിനേശ് അവതരിപ്പിക്കുന്ന ‘ആരുടെ പതാക’ എന്ന ഏകപാത്ര നാടകവും പരിപാടിയുടെ ഭാഗമായിരിക്കും. തുടർന്ന് ഇ. പി. രാജഗോപാലൻ ‘മലയാള നാടകവേദി’ എന്ന വിഷയത്തിൽ പ്രഭാഷണം നടത്തും. തുടർന്ന് പ്രകാശ് ബാരെ, അനിൽ തിരുമംഗലം, കെ. ആർ. കിഷോർ എന്നിവർ പങ്കെടുക്കുന്ന സംവാദവും സംഘടിപ്പിക്കും.
വൈകിട്ട് 6 മണിക്ക് നടക്കുന്ന കൈരളി കലാസമിതി മലയാള സാഹിത്യ പുരസ്കാര സമർപ്പണ ചടങ്ങിൽ ജനറൽ സെക്രട്ടറി പി. കെ. സുധീഷ് സ്വാഗതം ആശംസിക്കും. പ്രസിഡന്റ് സുധാകരൻ രാമന്തളി അധ്യക്ഷത വഹിക്കുന്ന ചടങ്ങിൽ പ്രശസ്ത കന്നഡ കവി ഡോ. ഹംപ നാഗരാജയ്യ മുഖ്യാതിഥിയായിരിക്കും. ഡോ. ഹംപ നാഗരാജയ്യയിൽ നിന്ന് സാറാ ജോസഫ് സാഹിത്യ പുരസ്കാരം ഏറ്റുവാങ്ങും. സുഭാഷ് ചന്ദ്രൻ, റഫീഖ് അഹമ്മദ്, ഇ. പി. രാജഗോപാലൻ എന്നിവർ ആശംസകൾ നേർന്ന് സംസാരിക്കും. കെ. രാധാകൃഷ്ണൻ നന്ദി രേഖപ്പെടുത്തും.
പുരസ്കാര സമർപ്പണച്ചടങ്ങിന് ശേഷം കല്ലറ ഗോപൻ, ചെങ്ങന്നൂർ ശ്രീകുമാർ, റിനാ മുരളി എന്നിവർ അവതരിപ്പിക്കുന്ന ‘മധുര ഗീതങ്ങൾ’ സംഗീതസന്ധ്യയോടെ സാഹിത്യോത്സവം സമാപിക്കുമെന്ന് ജനറൽ സെക്രട്ടറി പി. കെ. സുധീഷ് അറിയിച്ചു. ഫോണ്‍: 9845439090.
SUMMARY: Kairali Kala Samiti to hold ‘Sahityotsavam’ in Bengaluru on 12th
