ബെംഗളൂരു: ബ്രിഗേഡ് എൽഡൊറാഡോ മലയാളി അസോസിയേഷന്റെ നേതൃത്വത്തിൽ സംഘടിപ്പിച്ച ‘ആരംഭം 2026’ ഓണാഘോഷം വൈവിധ്യമാർന്ന കലാ, കായിക, സാംസ്കാരിക പരിപാടികളോടെ നടന്നു, വർണാഭമായി. ബ്രിഗേഡ് എൽഡൊറാഡോയിലെ ആദ്യ ഓണാഘോഷമായ പരിപാടി മലയാളികൾക്കൊപ്പം വിവിധ സംസ്ഥാനങ്ങളിൽ നിന്നുള്ള താമസക്കാരെയും ഒരുമിപ്പിച്ച സാംസ്കാരിക സംഗമമായി മാറി.
അറുപതിലേറെ വനിതകൾ അണിനിരന്ന മെഗാ തിരുവാതിരയായിരുന്നു ആഘോഷത്തിന്റെ മുഖ്യ ആകർഷണം. കേരളത്തിന്റെ തനത് പാരമ്പര്യവും കലാസൗന്ദര്യവും വേദിയിൽ അവതരിപ്പിച്ച തിരുവാതിരയ്ക്ക് മികച്ച പ്രതികരണമാണ് ലഭിച്ചത്. മാവേലിയുടെ അകമ്പടിയോടെ നടന്ന താലപ്പൊലി ഘോഷയാത്രയിൽ കഥകളി വേഷവിധാനങ്ങളും ശിങ്കാരിമേളവും കേരളീയ പാരമ്പര്യത്തിന്റെ മനോഹാരിത പകർന്നു. വിവിധ സംസ്ഥാനങ്ങളുടെ സംസ്കാരവും പാരമ്പര്യ വേഷവിധാനങ്ങളും അവതരിപ്പിച്ച ‘കളേഴ്സ് ഓഫ് ഇന്ത്യ’ ഫാഷൻ ഷോയും ശ്രദ്ധേയമായി.
കുട്ടികൾക്കും മുതിർന്നവർക്കുമായി സംഘടിപ്പിച്ച വിവിധ കായിക മത്സരങ്ങളും ആവേശകരമായ വടംവലി മത്സരവും ആഘോഷത്തിന് കൂടുതൽ ഉണർവേകി. വിവിധ സംഘങ്ങളുടെ നൃത്ത-സംഗീത പരിപാടികൾ, നാടൻ കലാരൂപങ്ങൾ, പ്രത്യേക തെയ്യം നൃത്താവിഷ്കാരം, കുട്ടികളുടെയും മുതിർന്നവരുടെയും വിവിധ കലാപരിപാടികൾ എന്നിവയും അരങ്ങേറി. കേരളീയ പാരമ്പര്യത്തിന്റെ രുചി പകർന്ന വിഭവസമൃദ്ധമായ ഗ്രാൻഡ് ഓണസദ്യയും ആഘോഷത്തിന്റെ പ്രധാന ഭാഗമായി.
SUMMARY: Brigade Eldorado Onam celebrations; Women’s mega Thiruvathira was notable
