ബെംഗളൂരു: രാഷ്ട്രപിതാവ് മഹാത്മാഗാന്ധിയുടെ 157-ാമത് ജന്മദിനം സമുചിതമായി ആഘോഷിച്ച് ബെംഗളൂരുവിലെ മലയാളി കൂട്ടായ്മകള്‍.
കർണാടക മലയാളി കോൺഗ്രസ്
എം.ജി. റോഡിലെ ഗാന്ധി സ്മൃതിമണ്ഡപത്തിൽ പുഷ്പാർച്ചന നടത്തി. സംസ്ഥാന പ്രസിഡന്റ് സുനിൽ തോമസ് മണ്ണിൽ, സംസ്ഥാന ജനറൽ സെക്രട്ടറി നന്ദകുമാർ കൂടത്തിൽ എന്നിവർ നേതൃത്വം നൽകി. സംസ്ഥാന ഭാരവാഹികളായ ഡാനി ജോൺ, രാജീവൻ കളരിക്കൽ, സോമരാജൻ, ഷാജി ജോർജ്, നിമ്മി രവീന്ദ്രൻ, ഓസ്റ്റിൻ ഡാനി എന്നിവർ സംസാരിച്ചു. വോട്ടർപട്ടികയിൽ കൃത്രിമത്വം നടത്തുന്ന തിരഞ്ഞെടുപ്പ് കമ്മീഷനെതിരെ കോൺഗ്രസ് രാജ്യവ്യാപകമായി നടത്തുന്ന പ്രക്ഷോഭത്തിന് ഐക്യദാർഢ്യം പ്രഖ്യാപിച്ചു. മുഖ്യതിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ ഫോട്ടോയിൽ കറുത്തമാല അണിയിച്ച് പ്രതിഷേധിച്ചു. ഗ്യാനേഷ് കുമാർ രാജി വെക്കണമെന്നും ആവശ്യപ്പെട്ടു.
പ്രവാസി മലയാളി അസോസിയേഷൻ കർണാടക
പ്രവാസി മലയാളി അസോസിയേഷൻ കർണാടകയുടെ നേതൃത്വത്തിൽ മഹാത്മാഗാന്ധി അനുസ്മരണം സംഘടിപ്പിച്ചു. മധുസൂദനൻ നമ്പൂതിരി അനുസ്മരണ പ്രഭാഷണം നടത്തി. പ്രസിഡന്റ് രമേഷ്കുമാർ, ചെയർമാൻ ഡി.ആർ.കെ. പിള്ള, ജനറൽ സെക്രട്ടറി രാഗേഷ് എന്നിവർ സംസാരിച്ചു. വെറ്റ്ഫീൽഡ് ശാഖാ കോർഡിനേറ്റർ മുരളിധരൻ രൂപകൽപ്പന നിർവഹിച്ച ‘ഗ്ലിറ്ററിങ് ഗാന്ധി’ കലാസൃഷ്ടി പ്രദർശിപ്പിച്ചു. ഗാന്ധിജിയുടെ ആശയങ്ങൾ ജീവിതത്തിൽ പകർത്താൻ അംഗങ്ങൾ സത്യപ്രതിജ്ഞ ചെയ്തു.
വിവേകാനന്ദ ഫ്രണ്ട്സ് അസോസിയേഷൻ
മഹാത്മാഗാന്ധിയുടെ 157-ാം ജന്മദിനവും ലാൽബഹാദൂർ ശാസ്ത്രിയുടെ 122-ാം ജന്മദിനവും ആഘോഷിച്ച് വിവേകാനന്ദ ഫ്രണ്ട്സ് അസോസിയേഷൻ. ഗീതാനഗർ വിവേകാനന്ദ പാർക്കിൽ സംഘടിപ്പിച്ച ചടങ്ങില്‍ സംസ്ഥാന ജൈവ ഊര്‍ജ വികസന ബോർഡ് ചെയർമാൻ എസ്.ഇ. സുധീന്ദ്ര, അസോസിയേഷൻ ഭാരവാഹികളായ മുരളി, ശിവു, ശിവകുമാർ, രാമചന്ദ്രപ്പ തുടങ്ങിയവര്‍ പങ്കെടുത്തു.
