ബെംഗളൂരു: നഗരത്തിലെ കമ്മഗൊണ്ടനഹള്ളിയിൽ ഒക്ടോബർ 24-ന് രാത്രി ഉണ്ടായ തീപിടിത്തത്തിൽ രണ്ട് ദിവസം കഴിഞ്ഞ് യുവദമ്പതികളുടെ മൃതദേഹങ്ങൾ കണ്ടെത്തി. അബ്ബിഗെരെ മെയിൻ റോഡിലെ ലൂബ്രിക്കന്റ് കടയിലുണ്ടായ തീപിടിത്തത്തിലാണ് പ്രദേശത്തെ ഞെട്ടിച്ച സംഭവം
കെ.ജി. ഹള്ളിയിലെ പെട്രോൾ പമ്പിൽ ജോലി ചെയ്തിരുന്ന ആകാശും (27)ഭാര്യ നാഗരത്നയും (24) ആണ് മരിച്ചത്. കടയുടെ മുകളിലെ നിലയിലെ മുറിയിലായിരുന്നു ഇരുവരും താമസിച്ചിരുന്നത്. തീപിടിത്തത്തിനിടെ പുക മുറിയിലേക്ക് വ്യാപിച്ചതോടെ ഇരുവരും ശ്വാസംമുട്ടി മരിച്ചതായാണ് പോലീസിന്റെ പ്രാഥമിക നിഗമനം.
തീപിടിത്തമുണ്ടായ ഉടൻ അഗ്നിരക്ഷാസേനയും പോലീസും സ്ഥലത്തെത്തി തീ നിയന്ത്രണവിധേയമാക്കിയിരുന്നു. അന്ന് കെട്ടിടത്തിനുള്ളിൽ ആരും കുടുങ്ങിയിട്ടില്ലെന്നാണ് അധികൃതർ കരുതിയത്.
എന്നാൽ തിങ്കളാഴ്ച കെട്ടിടത്തിനുള്ളിൽനിന്ന് ദുർഗന്ധം ഉയരുന്നതായി വിവരം ലഭിച്ചതിനെത്തുടർന്ന് പോലീസ് വീണ്ടും പരിശോധന നടത്തി. ഒന്നാം നിലയിലെ അടച്ചിട്ട മുറിയിൽനിന്നാണ് ദമ്പതികളുടെ മൃതദേഹങ്ങൾ കണ്ടെത്തിയത്.
കടയിൽ എണ്ണ, ലൂബ്രിക്കന്റുകൾ, തീപിടിക്കാൻ സാധ്യതയുള്ള മറ്റ് വസ്തുക്കൾ എന്നിവ സൂക്ഷിച്ചിരുന്നതായി റിപ്പോർട്ടുകളുണ്ട്. ഗ്യാസ് സിലിണ്ടറുകൾ കൈകാര്യം ചെയ്തതിൽ നിയമലംഘനമുണ്ടായിരുന്നോ എന്നും അനധികൃതമായി ഗ്യാസ് നിറയ്ക്കുന്ന പ്രവൃത്തി നടന്നിരുന്നോ എന്നും പോലീസ് അന്വേഷിക്കുകയാണ്.
സംഭവത്തിൽ പോലീസ് കേസെടുത്ത് അന്വേഷണം തുടരുകയാണ്. തീപിടിത്തത്തിന്റെ കാരണം കണ്ടെത്തുന്നതിനൊപ്പം കെട്ടിടത്തിലെ സുരക്ഷാ ക്രമീകരണങ്ങളും അധികൃതർ പരിശോധിക്കുന്നുണ്ട്.
SUMMARY: Young couple meets tragic end in a fire at Kammagondanahalli, Bengaluru; bodies discovered two days later.
