ബെംഗളൂരു: മെട്രോ ഗ്രീൻ ലൈനിന്റെ ഭാഗമായ നാഗസാന്ദ്ര – മാധവാര വരെയുടെ 3.14 കിലോമീറ്റർ പാതയിൽ സുരക്ഷ പരിശോധന ഒക്ടോബറിൽ നടക്കുമെന്ന് ബിഎംആർസിഎൽ അറിയിച്ചു. ഒക്ടോബർ 3, 4 തീയതികളിലാണ് പരിശോധന നടത്തുക. സുരക്ഷാ പരിശോധനകൾ വിജയകരമായാൽ ഒക്ടോബർ അവസാനത്തോടെ ഈ റൂട്ടിൽ സർവീസ് ആരംഭിക്കുമെന്ന് ബിഎംആർസിഎൽ ഉദ്യോഗസ്ഥർ പറഞ്ഞു. മെട്രോ റെയിൽവേ സുരക്ഷാ കമ്മീഷണർ (സിഎംആർഎസ്) എ.എം. ചൗധരിയുടെ മേൽനോട്ടത്തിലാകും പരിശോധന നടക്കുക.
സ്റ്റേഷനുകളിലെ ട്രാക്കുകൾ, സിഗ്നൽ സംവിധാനങ്ങൾ, ട്രാക്ഷൻ, വയഡക്ട്‌സ്, ഗർഡറുകൾ, ട്രെയിൻ സെറ്റുകൾ, യാത്രക്കാർക്കുള്ള സൗകര്യങ്ങൾ, സുരക്ഷാ സംവിധാനങ്ങൾ എന്നിവ പരിശോധനയിൽ ഉൾപ്പെടും. 25 കിലോമീറ്റർ വേഗതയിൽ ട്രെയിനുകളുടെ പരീക്ഷണയോട്ടം കഴിഞ്ഞമാസം നടത്തിയിരുന്നു. സുരക്ഷ പരിശോധന സംബന്ധിച്ച് ബിഎംആർസിഎൽ ഓഗസ്റ്റ് ഏഴിന് സിഎംആർഎസിനെ ബന്ധപ്പെട്ടിരുന്നു. ഇതേതുടർന്ന് സിഎംആർഎസ് പദ്ധതികളുടെ രേഖകൾ ഉൾപ്പെടെ പരിശോധനയ്ക്കായി വാങ്ങിയിരുന്നു. ഒക്ടോബർ മാസത്തോടെ റൂട്ട് പ്രവർത്തനക്ഷമമാകുമെന്ന് ബിഎംആർസിഎൽ നേരത്തെ വ്യക്തമാക്കിയിരുന്നു.
TAGS: BENGALURU | NAMMA METRO
SUMMARY: Safety inspection at Nagasandra – madavara metro route in october
