ബെംഗളൂരു: ബെംഗളൂരു മെട്രോ ബ്ലൂ ലൈൻ 2027-ഓടെ പ്രവർത്തനം ആരംഭിക്കുമെന്ന് ബിഎംആർസിഎൽ അറിയിച്ചു. സെൻട്രൽ സിൽക്ക് ബോർഡിനെ ബെംഗളൂരു കെംപെഗൗഡ അന്താരാഷ്ട്ര വിമാനത്താവളവുമായി ബന്ധിപ്പിക്കുന്നതാണ് ലൈൻ. ഔട്ടർ റിംഗ് റോഡിലൂടെയാണ് ബ്ലൂ ലൈൻ കടന്നു പോകുന്നത്. ഈ പ്രദേശത്ത് നിരവധി ഐടി കമ്പനികൾ സ്ഥിതി ചെയ്യുന്നുണ്ട്. മെട്രോ ബ്ലൂ ലൈൻ പ്രവർത്തനം ആരംഭിക്കുന്നതെത്തോടെ ഈ റൂട്ടിലൂടെയുള്ള ഗതാഗതക്കുരുക്കിന് പരിഹാരം ആകുമെന്ന് ബിഎംആർസിഎൽ പറഞ്ഞു.
നേരത്തെ ബ്ലൂ ലൈൻ 2026ൽ പ്രവർത്തനം ആരംഭിക്കുമെന്ന് സർക്കാർ പ്രഖ്യാപിച്ചെങ്കിലും നിരവധി കാരണങ്ങളാൽ പദ്ധതി വൈകുകയായിരുന്നു. നിലവിൽ ബ്ലൂ ലൈനിന്റെ പ്രവർത്തനങ്ങൾ നല്ല രീതിയിൽ നടക്കുന്നുണ്ട്. 2027 ആകുമ്പോഴേക്കും ബ്ലൂ ലൈനുകൾ പ്രവർത്തനം ആരംഭിക്കുമെന്ന് ബിഎംആർസിഎൽ ഉദ്യോഗസ്ഥർ വ്യക്തമാക്കി. ബ്ലൂ ലൈനിനൊപ്പം പിങ്ക് ലൈൻ മെട്രോയുടെ നിർമാണവും അതിവേഗം പൂർത്തിയാക്കാൻ ബിഎംആർസിഎൽ പദ്ധതിയിടുന്നുണ്ട്.
രണ്ട് ഘട്ടങ്ങളിലായി നിർമിക്കുന്ന ബ്ലു ലൈനിൻ്റെ ആദ്യഘട്ടത്തിൻ്റെ (ഫേസ് 2 എ) നിർമാണം 2021 ഓഗസ്റ്റിലും രണ്ടാംഘട്ടത്തിൻ്റെ (ഫേസ് 2 ബി) നിർമാണം 2022 ഫെബ്രുവരിയിലും ആരംഭിച്ചു. ബ്ലു ലൈനിൻ്റെ ആകെ നീളം 58.19 കിലോമീറ്റർ ആണ്. മൊത്തം 30 സ്റ്റേഷനുകളാണ് ലൈനിൽ ഉണ്ടാകുക. യെല്ലോ ലൈനിൽ സെൻട്രൽ സിൽക്ക് ബോർഡ്, പർപ്പിൾ ലൈനിൽ കെആർ പുരം, പിങ്ക് ലൈനിൽ നാഗവാര, നിർദിഷ്ട ഓറഞ്ച് ലൈനിൽ ഹെബ്ബാൾ എന്നിവിടങ്ങളിൽ ബ്ലു ലൈനിന് ഇൻ്റർചേഞ്ചുകൾ ഉണ്ടാകും.
TAGS: BENGALURU | NAMMA METRO
SUMMARY: Bengaluru Blue metro line to start by 2027
