ബെംഗളൂരു: നിലപാടുകളുടെ ആവിഷ്ക്കാരമാണ് നിരൂപകരും എഴുത്തുകാരും നിർവ്വഹിക്കുന്നതെന്നും, വായന, ഉന്നത മാനുഷിക മൂല്യങ്ങളിലേക്ക് വഴിനടത്തുമെന്നും ഡോ കെ എസ് രവികുമാർ. കേരളസമാജം ദൂരവാണിനഗർ ഓണാഘോഷത്തിന്റെ ഭാഗമായി നടത്തിയ സംവാദത്തിൽ “എഴുത്തിന്റെയും നിരൂപണത്തിന്റെയും വർത്തമാനം” എന്ന വിഷയം അവതരിപ്പിച്ചു സംസാരിക്കുകയായിരുന്നു അദ്ദേഹം.
നിരൂപണം പൊതുവെ നടക്കുന്നത് പൊതു സാമാന്യ ബോധത്തിന്റെ അളവുകോൽ വെച്ചാണ്. ചലച്ചിത്ര ഗാന മത്സരത്തിൽ നല്ല വണ്ണം പാടുന്നവർക്ക് കയ്യടിയും അല്ലാത്തവർക്ക് കൂക്കി വിളിയും കിട്ടുന്നതിന് സമമായ ഇടപെടലാണ് നിരൂപണം നിർവ്വഹിക്കുന്നത്. വളരെ അപകടകരമായ കാലത്താണ് നമ്മൾ ജീവിക്കുന്നത്. ഇങ്ങനെയുള്ള കാലത്തെ പ്രതിരോധിക്കാൻ മനുഷ്യർക്ക് നിലപാട് വേണം. നാം ജീവിക്കുന്ന ലോകത്തെക്കുറിച്ച് വ്യക്തമായ ധാരണയും നിലപാടും ഉണ്ടാവണം. വായനയിലൂടെയും ചിന്തയിലൂടെയും ആർജ്ജിച്ച നിലപാട് അനുസരിച്ചാണ് നിരൂപകൻ വിലയിരുത്തുന്നതെന്നും അദ്ദേഹം പറഞ്ഞു.
എല്ലാവിധ അധികാരങ്ങൾക്കുമതിരെ പ്രതിരോധം തീർക്കുക എന്നതാണ് എഴുത്തിന്റെയും വിമർശനത്തിന്റെയും അടിസ്ഥാന ശക്തി. അധികാര ഘടന കുടുംബത്തിൽ അടക്കമുണ്ട്. അധികാരത്തിനെതിരെയുള്ള പ്രതിരോധം എല്ലായിടത്തും ഉണ്ടാവണം. അപരൻ എന്ന് മുദ്രകുത്തി വോട്ടേഴ്സ് ലിസ്റ്റിൽ നിന്ന് തള്ളിക്കളയുന്ന, റേഷൻ കാർഡ് നൽകാതിരിക്കുന്ന, വ്യവസ്ഥക്കെതിരെ, എല്ലാ വിധ അനീതിക്കുമെതിരെ നിലപാട് കൊണ്ട് പ്രതിരോധിക്കുന്നവരാണ് നിരൂപകരും എഴുത്തുകാരും എന്ന് ഡോ രവികുമാർ പറഞ്ഞു.
മാറ്റി നിർത്തപ്പെട്ടവരുടെയും അവഗണിക്കപ്പെട്ടവരുടെയും ജീവിതമാണ് തന്നെക്കൊണ്ട് കഥകൾ എഴുതിക്കുന്നതെന്നും കഥകളില്ലാതെ ജീവിതമില്ലെന്നും ഓരോ അനുഭവങ്ങളിലും കഥകൾ ഉണ്ടെന്നും പ്രശസ്ത നോവലിസ്റ്റും തിരക്കഥാകൃത്തും കഥാകാരനുമായ പി വി ഷാജികുമാർ പറഞ്ഞു.
തുടർന്ന് നടന്ന സംവാദം പ്രശസ്ത നിരൂപകനായ സുധാകരന് രാമന്തളി ഉദ്ഘാടനം ചെയ്തു. സമാജം പ്രസിഡന്റ് മുരളീധരൻ നായർ അധ്യക്ഷത വഹിച്ചു. സാഹിത്യ വിഭാഗം കൺവീനർ സി കുഞ്ഞപ്പൻ, എഡുകേഷണൽ സെക്രട്ടറി കെ ചന്ദ്രശേഖരൻ നായർ എന്നിവർ യഥാക്രമം ഡോക്ടർ കെ എസ് രവി കുമാറിനെയും, പി വി ഷാജി കുമാറിനെയും പരിചയപ്പെടുത്തി. ജനറൽ സെക്രട്ടറി ഡെന്നിസ് പോൾ, ഡോ. രാജന്, വി.കെ. സുരേന്ദ്രന്, ശാന്തകുമാര് എലപ്പുള്ളി, കെ.ആര്. കിഷോര്, എസ്.കെ. നായര്, പീറ്റര് ജോര്ജ്, ടി ഇ കലിസ്റ്റസ്, സി. ചക്രപാണി എന്നിവര് സംവാദത്തിൽ പങ്കെടുത്തു.
മേധ എസ്. നായര്, അമൃത ലക്ഷ്മി, സൗദ അബ്ദുൾ റഹ്മാന്, റാണി ശശികുമാര്, അനിത മധു, സംഗീത രാമചന്ദ്രന്, ഉണ്ണികൃഷ്ണന് അരിക്കത്ത്, വി.കെ ഗോപി വാര്യര് എന്നിവര് കവിതകള് ആലപിച്ചു. ട്രഷറർ എം കെ ചന്ദ്രൻ, ജോയന്റ് സെക്രട്ടറി ജോണി പി സി എന്നിവർ അതിഥികൾക്ക് പൂച്ചെണ്ടു നൽകി. വൈസ് പ്രസിഡന്റ് എം.പി. വിജയന് നന്ദി രേഖപ്പെടുത്തി.
SUMMARY: Kerala Samajam Dooravaninagar literature programme
