ബെംഗളുരു: വിവിധ ക്രൈസ്തവ സഭകളിലെ വിശ്വാസികളുടെ കൂട്ടായ്മയായ ‘മൈ ചര്‍ച്ചി’ന്റെ ആഭിമുഖ്യത്തില്‍ കര്‍ണാടകയില്‍ നടപ്പാക്കുന്ന ജീവകാരുണ്യ പ്രവര്‍ത്തനങ്ങള്‍ക്ക് തുടക്കമായി. ക്യാമ്പസ് ക്രൂസേഡ് ഫോര്‍ ക്രൈസ്റ്റ് ഓഡിറ്റോറിയത്തില്‍ സംഘടിപ്പിച്ച ചടങ്ങില്‍ ‘മൈ ചര്‍ച്ച്’ സ്ഥാപകന്‍ എ.വി. തോമസ് കാരുണ്യ പ്രവര്‍ത്തനങ്ങള്‍ക്ക് തുടക്കം കുറിച്ച് ഉദ്ഘാടന സന്ദേശം നല്കി.
ഇതോടനുബന്ധിച്ച് സംഘടിപ്പിച്ച ക്രിസ്തീയ ഭക്തിഗാനങ്ങള്‍ കോര്‍ത്തിണക്കി ‘മൈ ചര്‍ച്ച്’ സംഘടിപ്പിച്ച രക്ഷകന്റെ ഗീതം സംഗീത സംഗമത്തില്‍ പ്രശസ്ത ചലച്ചിത്ര പിന്നണി ഗായകന്‍ കെ.ജി. മാര്‍ക്കോസ്, യുവഗായകരായ മെറിന്‍ ഗ്രിഗറി, ശ്രേയ അന്ന ജോസഫ് എന്നിവര്‍ ഗാനങ്ങള്‍ ആലപിച്ചു. ഹൃദയത്തില്‍ വിശ്വാസത്തെ ഊട്ടിയുറപ്പിച്ച അനുഭവങ്ങളുടെ ജീവിതസാക്ഷ്യം ഗായകന്‍ കെ.ജി. മാര്‍ക്കോസ് വേദിയില്‍ പങ്കുവച്ചു.
‘രക്ഷകന്റെ ഗീതം’- സംഗീത പരിപാടിയുടെ മീഡിയ പാര്‍ട്ണര്‍ ആയ ബെംഗളുരു ക്രിസ്ത്യന്‍ പ്രസ് അസോസിയേഷന്‍ (ബിസിപിഎ) പ്രസിഡന്റ് ചാക്കോ കെ. തോമസ്, സെക്രട്ടറി പാസ്റ്റര്‍ ജോസഫ് ജോണ്‍ എന്നിവര്‍ക്കുള്ള ഉപഹാരം കെ.ജി. മാര്‍ക്കോസ് നല്കി.
സംഗീത സംഗമത്തിന്റെ മുഖ്യ സംഘാടകന്‍ സുനില്‍ മാത്യു സ്വാഗതവും നന്ദിയും രേഖപ്പെടുത്തി. രണ്ടര മണിക്കൂര്‍ നീണ്ട സംഗീത പരിപാടി ‘മൈ ചര്‍ച്ച്’ ഒരുക്കിയ സ്‌നേഹവിരുന്നോടെയാണ് സമാപിച്ചത്.
SUMMARY: ‘My Church’ charity work begins in Karnataka
