ബെംഗളൂരു: മൈസൂരുവിൽ അനധികൃതമായി പ്രവർത്തിക്കുന്ന ലഹരി നിർമാണ ലാബില് നാർക്കോട്ടിക് കൺട്രോൾ ബ്യൂറോ (എൻസിബി) നടത്തിയ പരിശോധനയില് 10 കോടി രൂപയുടെ രാസലഹരി പിടിച്ചെടുത്തു. സംഭവത്തില് രാജസ്ഥാൻ ജലോർ സ്വദേശികളായ 4 പേരെ അറസ്റ്റ് ചെയ്തു. 25.6 ലക്ഷം രൂപയും ഒരു എസ്യുവിയും 500 കിലോ രാസപദാർഥങ്ങളും പിടിച്ചെടുത്തവയിൽ ഉൾപ്പെടുന്നു.
ജനുവരി 28 ന് ഗുജറാത്തിലെ സൂറത്ത് ജില്ലയിലെ പൽസാനയിൽ ഒരു കാറിൽനിന്ന് 35 കിലോ രാസലഹരിയായ മെഫെഡ്രോൺ പിടിച്ചെടുത്തിരുന്നു. തുടര്ന്നു നടത്തിയ അന്വേഷണമാണ് മൈസൂരു ഹെബ്ബാൾ വ്യവസായ മേഖലയിൽ പ്രവർത്തിക്കുന്ന ലാബിനെ കുറിച്ച് ഉദ്യോഗസ്ഥര്ക്ക് വിവരം ലഭിച്ചത്. മയക്കുമരുന്ന് ശൃംഖലയുടെ സൂത്രധാരനായ മഹീന്ദ്ര കുമാർ വിഷ്ണോയ് ഉൾപ്പെടെയുള്ളവരാണ് അറസ്റ്റിലായത്. മഹീന്ദ്രയുടെ ബന്ധു 2024ൽ വാടകയ്ക്കെടുത്തിരുന്ന കെട്ടിടത്തിൽ രാസപദാർഥ നിർമാണത്തിനെന്ന വ്യാജേനയാണ് ലാബ് പ്രവർത്തിച്ചുവരുന്നത്. ലാബ് സ്ഥിതി ചെയ്യുന്ന യൂണിറ്റ് ഫോറൻസിക് സംഘം പരിശോധനയ്ക്കായി സീൽ ചെയ്തിട്ടുണ്ട്.
പിടിയിലായ വിഷ്ണോയ് ഒരു സ്ഥിരം കുറ്റവാളിയാണെന്നും, രാജസ്ഥാനിൽ മൂന്ന് കേസുകളും ഗുജറാത്തിൽ ഒരു കേസും ഇയാൾക്കെതിരെ രജിസ്റ്റർ ചെയ്തിട്ടുണ്ട് എന്നും അന്വേഷണത്തിൽ വ്യക്തമായി. 2024 ൽ സ്ഥാപിച്ച മൈസൂരുവിലെ രഹസ്യ ലാബ് ഒന്നിലധികം കൺസൈൻമെന്റുകൾ നിർമ്മിച്ച് വിതരണം ചെയ്തതായി എൻസിബി അറിയിച്ചു.
SUMMARY: Raid on drug manufacturing lab in Mysuru; Drugs worth Rs 10 crore seized
