കേപ് കാനവറല്: ലോകപ്രശസ്ത ബഹിരാകാശ സഞ്ചാരി സുനിത വില്യംസ് നാസയില് നിന്നും വിരമിച്ചു. അന്താരാഷ്ട്ര ബഹിരാകാശ നിലയത്തില് ഒമ്പത് മാസത്തോളം നീണ്ടുനിന്ന അപ്രതീക്ഷിത പ്രതിസന്ധികളെ അതിജീവിച്ച് മടങ്ങിയെത്തിയതിന് പിന്നാലെയാണ് വിരമിക്കല് പ്രഖ്യാപനം. 2025 ഡിസംബര് 31-ഓടെ അവര് ഔദ്യോഗികമായി നാസയുടെ പടിയിറങ്ങിയതായി ഏജന്സി സ്ഥിരീകരിച്ചു.
60-ാം വയസ്സില് വിരമിക്കുമ്പോള്, ബഹിരാകാശത്ത് ആകെ 608 ദിവസങ്ങള് ചെലവഴിച്ച അത്യപൂര്വ്വ നേട്ടവുമായാണ് ഈ മുന് നേവി ക്യാപ്റ്റന് മടങ്ങുന്നത്. നാസയിലെ 27 വര്ഷത്തെ സേവനത്തിനിടയില് മൂന്ന് തവണ സുനിത ബഹിരാകാശ നിലയത്തിലേക്ക് ദൗത്യങ്ങള് നടത്തിയിട്ടുണ്ട്. ഏറ്റവും കൂടുതല് സമയം ബഹിരാകാശത്ത് നടന്ന വനിത എന്ന റെക്കോര്ഡും ഇവര്ക്ക് സ്വന്തമാണ്. ഒമ്പത് തവണയായി 62 മണിക്കൂറാണ് അവര് ബഹിരാകാശ നിലയത്തിന് പുറത്ത് നടന്നത്.
സോളാര് പാനലുകളുടെ അറ്റകുറ്റപ്പണികള് ഉള്പ്പെടെയുള്ള നിര്ണ്ണായക ജോലികള് ഈ സമയത്ത് അവര് നിര്വ്വഹിച്ചു. ബോയിംഗിന്റെ ‘സ്റ്റാര്ലൈനര്’ പേടകത്തിന്റെ പരീക്ഷണ പറക്കലിന്റെ ഭാഗമായി 2024 ജൂണിലാണ് സുനിത വില്യംസും സഹയാത്രികന് ബാരി വില്മോറും ബഹിരാകാശ നിലയത്തിലേക്ക് തിരിച്ചത്.
വെറും എട്ട് ദിവസത്തെ ദൗത്യമായിരുന്നു ലക്ഷ്യമെങ്കിലും പേടകത്തിന്റെ സാങ്കേതിക തകരാറുകളും ഹീലിയം ചോര്ച്ചയും കാരണം യാത്ര പ്രതിസന്ധിയിലായി. ഇതോടെ ഒമ്പത് മാസത്തോളം അവര്ക്ക് ബഹിരാകാശത്ത് തുടരേണ്ടി വന്നു. ഒടുവില് 2025 മാര്ച്ചില് സ്പേസ് എക്സിന്റെ ക്രൂ ഡ്രാഗണ് പേടകത്തിലാണ് അവര് ഭൂമിയിലേക്ക് സുരക്ഷിതമായി മടങ്ങിയെത്തിയത്.
SUMMARY: Sunita Williams ends 27-year legendary journey
