തിരുവനന്തപുരം: സംസ്ഥാനത്തെ ഏറ്റവും പ്രായം കുറഞ്ഞ അവയവദാതാവായ ആലിൻ ഷെറിൻ എബ്രഹാമിന്റെ സ്മരണയില്‍ സപ്ലൈകോ പ്രത്യേക നോട്ട്ബുക്കുകള്‍ പുറത്തിറക്കുന്നു. ‘ആലിൻ’ ബ്രാൻഡില്‍ പുറത്തിറക്കുന്ന നോട്ട്ബുക്കുകളുടെ ഔദ്യോഗിക പ്രകാശനം ചൊവ്വാഴ്ച നടക്കും. ഭക്ഷ്യ പൊതുവിതരണ വകുപ്പ് മന്ത്രി അനൂപ് ജേക്കബ് ചടങ്ങ് ഉദ്ഘാടനം ചെയ്യും.
മേയർ മിനിമോള്‍ വി.കെ അധ്യക്ഷയാകുന്ന ചടങ്ങില്‍ ആലിന്റെ മാതാപിതാക്കളായ അരുണ്‍ എബ്രഹാം, ഷെറിൻ ആൻ ജോണ്‍ എന്നിവരെ ആദരിക്കും. നോട്ട്ബുക്കുകളുടെ കവർ ഡിസൈൻ തയ്യാറാക്കിയ തേവര സേക്രഡ് ഹാർട്ട് കോളേജിലെ വിദ്യാർത്ഥികളെയും ചടങ്ങില്‍ അനുമോദിക്കും.
പത്തനംതിട്ട മല്ലപ്പള്ളി സ്വദേശികളായ അരുണ്‍-ഷെറിൻ ദമ്പതികളുടെ മകളായ ആലിൻ ഷെറിൻ എബ്രഹാം വാഹനാപകടത്തെ തുടർന്ന് മരിക്കുകയായിരുന്നു. മരണസമയത്ത് കുഞ്ഞിന് 10 മാസം മാത്രമായിരുന്നു പ്രായം.കുഞ്ഞിന്റെ ഹൃദയ വാല്‍വ്, കരള്‍, വൃക്ക, കണ്ണുകള്‍ എന്നിവ മാതാപിതാക്കള്‍ ദാനം ചെയ്തിരുന്നു. ഇതിലൂടെ നാല് പേർക്കാണ് പുതുജീവൻ ലഭിച്ചത്.
SUMMARY: Supplyco launches notebook in the name of Ali, the country’s youngest organ donor
