ബെംഗളൂരു: ഉത്തര കന്നഡ ജില്ലയിലെ യെല്ലാപുര് താലൂക്കിലെ അറബൈൽ ചുരത്തില് ക്രൂസർ വാഹനവും ലോറിയും കൂട്ടിയിടിച്ചുണ്ടായ ദാരുണ അപകടത്തിൽ ആറുപേർ മരിച്ചു. നാല് പേർക്ക് ഗുരുതരമായി പരുക്കേറ്റതായി പോലീസ് അറിയിച്ചു.
ധാർവാഡിൽ നിന്ന് വിനോദയാത്രയ്ക്കായി ഗോവയിലേക്ക് പുറപ്പെട്ട സംഘമാണ് അപകടത്തിൽപ്പെട്ടത്. പുലർച്ചെയോടെയായിരുന്നു അപകടം. വളവുകളും കുത്തനെയുള്ള ഇറക്കങ്ങളും നിറഞ്ഞ അറബൈൽ ഘാട്ടിൽ നിയന്ത്രണം വിട്ട വാഹനങ്ങൾ നേർക്കുനേർ കൂട്ടിയിടിക്കുകയായിരുന്നു എന്നാണ് പ്രാഥമിക നിഗമനം.
അപകടത്തെ തുടർന്ന് പ്രദേശവാസികളും പോലീസും അഗ്നിരക്ഷാസേനയും ചേർന്ന് രക്ഷാപ്രവർത്തനം നടത്തി. പരുക്കേറ്റവരെ യെല്ലാപുര് സർക്കാർ ആശുപത്രിയിലും പിന്നീട് ഹുബ്ബള്ളിയിലെ ആശുപത്രിയിലേക്കും മാറ്റി. മരിച്ചവരുടെ മൃതദേഹങ്ങൾ പോസ്റ്റ്മോർട്ടത്തിനായി അയച്ചു.
അപകടത്തിന്റെ യഥാർഥ കാരണം കണ്ടെത്താൻ പോലീസ് അന്വേഷണം ആരംഭിച്ചിട്ടുണ്ട്. കനത്ത മഴയെ തുടർന്ന് ഘാട്ട് റോഡുകളിൽ അതീവ ജാഗ്രത പാലിക്കണമെന്നും വാഹനമോടിക്കുന്നവർ വേഗപരിധി കർശനമായി പാലിക്കണമെന്നും പോലീസ് നിർദേശിച്ചു.
SUMMARY: Tragic accident at Yellapur Ghat; Six people on a picnic died
