ബെംഗളൂരു: ബെംഗളൂരുവിനും ബെളഗാവിക്കുമിടയിൽ വന്ദേ ഭാരത് ട്രെയിൻ സർവീസ് ഉടൻ ആരംഭിച്ചേക്കും. സർവീസ് ആരംഭിക്കുന്നതിന് കേന്ദ്ര റെയിൽവേ മന്ത്രാലയം അനുമതി നൽകിയതായി റെയിൽവേ, ജലശക്തി സഹമന്ത്രി വി. സോമണ്ണ അറിയിച്ചു. ബെളഗാവിയിൽ നിന്ന് ബെംഗളൂരുവിലേക്ക് സെമി-ഹൈ-സ്പീഡ് ട്രെയിൻ സർവീസ് നടത്തണമെന്നത് യാത്രക്കാരുടെ ഏറെനാളത്തെ ആവശ്യമാണ്.
ഈ വർഷം മാർച്ചിൽ, കേന്ദ്രമന്ത്രി പ്രഹ്ലാദ് ജോഷിയുടെ നേതൃത്വത്തിലുള്ള പ്രതിനിധി സംഘം റെയിൽവേ മന്ത്രി അശ്വിനി വൈഷ്ണവിനെ കണ്ട് ഇരുറൂട്ടുകൾക്കിടയിലും വന്ദേ ഭാരത് സർവീസ് അനുവദിക്കണമെന്ന് ആവശ്യപെട്ട് നിവേദനം നൽകിയിരുന്നു. നിലവിൽ വന്ദേ ഭാരത് എക്സ്പ്രസ് ബെംഗളൂരുവിനും ഹുബ്ബള്ളിക്കും ഇടയിൽ ധാർവാഡ് വഴിയാണ് സർവീസ് നടത്തുന്നത്. ഇതാണ് ബെളഗാവിയിലേക്ക് നീട്ടുന്നത്. കിത്തൂർ കർണാടക മേഖലയിലുടനീളവും യാത്ര ചെയ്യുന്ന പതിവ് യാത്രക്കാർക്ക് പുതിയ സർവീസ് സഹായകമാകുമെന്ന് മന്ത്രി സോമണ്ണ പറഞ്ഞു.
TAGS: BENGALURU | VANDE BHARAT
SUMMARY: Vande Bharat Express to connect Bengaluru and Belagavi soon
