മംഗളൂരു: മംഗളൂരു ജോക്കാട്ടെയിലുള്ള മംഗളൂരു റിഫൈനറി ആൻഡ് പെട്രോകെമിക്കൽസ് ലിമിറ്റഡ് (MRPL) പ്ലാന്റിൽ വൻ സ്ഫോടനം. ഉച്ചയ്ക്ക് 12.30 ഓടെയാണ് ഉച്ചത്തിലുള്ള സ്ഫോടന ശബ്ദം കേട്ടതെന്ന് നാട്ടുകാർ പറഞ്ഞു. എം ആർ പി എൽ-ന്റെ ഫേസ്-3 പ്ലാന്റിലെ ബോയിലർ പൊട്ടിത്തെറിച്ചതാണ് സ്ഫോടനത്തിന് കാരണമെന്നാണ് പ്രാഥമിക നിഗമനം.
സ്ഫോടനത്തെ തുടർന്ന് ഉണ്ടായ ശക്തമായ ശബ്ദവും വൻതോതില്‍ ഉയർന്ന കറുത്ത പുകയും പ്രദേശവാസികളില്‍ വലിയ ഭീതിയാണ് പരത്തിയത്. എങ്കിലും, സ്ഫോടനത്തിനുള്ള യഥാർത്ഥ കാരണം എന്താണെന്ന് ഇതുവരെ ഔദ്യോഗികമായി വ്യക്തമായിട്ടില്ല. അപകടത്തില്‍ രണ്ട് തൊഴിലാളികള്‍ക്ക് പൊള്ളലേല്‍ക്കുകയും മറ്റ് ആറ് പേർക്ക് നിസ്സാര പരുക്കുകള്‍ സംഭവിക്കുകയും ചെയ്തു. പരുക്കേറ്റ ഉടൻ തന്നെ ഇവരെ എല്ലാവരെയും സമീപത്തെ ആശുപത്രിയിലേക്ക് മാറ്റി ചികിത്സ ലഭ്യമാക്കി.
ആരുടെയും പരുക്ക് ഗുരുതരമല്ലെന്ന് കമ്പനി അധികൃതർ വ്യക്തമാക്കിയിട്ടുണ്ട്. സംഭവസ്ഥലത്ത് ഉടൻ തന്നെ ഫയർഫോഴ്സ് എത്തി തീയണയ്ക്കുകയും നിലവില്‍ സാഹചര്യം പൂർണ്ണമായി നിയന്ത്രണവിധേയമാക്കുകയും ചെയ്തു. അപകടകാരണത്തെക്കുറിച്ച്‌ വിദഗ്ധ സംഘം വിശദമായ അന്വേഷണം ആരംഭിച്ചിട്ടുണ്ടെന്ന് മംഗളൂരു സിറ്റി പോലീസ് കമ്മീഷണർ അറിയിച്ചു.
SUMMARY: Massive explosion at MRPL plant in Mangaluru
