വയനാട്: കേരളത്തില്‍ മനുഷ്യ-വന്യജീവി സംഘർഷങ്ങള്‍ ഏറ്റവും രൂക്ഷമായി തുടരുന്ന വയനാട് ജില്ലയില്‍ വന്യമൃഗശല്യത്തിന് അടിയന്തര തടയിടാൻ കർശന നടപടികളുമായി വനം-വന്യജീവി സംരക്ഷണ വകുപ്പ്. സർക്കാരിന്റെ നൂറു ദിന കർമ്മ പരിപാടിയുടെ ഭാഗമായി ജില്ലയിലെ വനമേഖലയില്‍ 60 കിലോമീറ്റർ ദൂരത്തില്‍ സോളാർ ഫെൻസിങ് സ്ഥാപിക്കുമെന്ന് വനം മന്ത്രി ഷിബു ബേബി ജോണ്‍ പ്രഖ്യാപിച്ചു.
കല്‍പറ്റ പി.ഡബ്ല്യു.ഡി റെസ്റ്റ് ഹൗസില്‍ മാധ്യമപ്രവർത്തകരോട് സംസാരിക്കവെയാണ് മന്ത്രി നിർണ്ണായക പ്രഖ്യാപനങ്ങള്‍ നടത്തിയത്. നിലവിലുള്ള 25 കിലോമീറ്റർ സോളാർ ഫെൻസിംഗിന്റെ അറ്റകുറ്റപ്പടികള്‍ പൂർത്തിയാക്കുന്നതിനൊപ്പം, നൂറു ദിവസത്തിനകം ജില്ലയ്ക്ക് നാല് പുതിയ റാപിഡ് റെസ്‌പോണ്‍സ് ടീമുകളെയും (RRT) അനുവദിക്കുമെന്ന് അദ്ദേഹം വ്യക്തമാക്കി.
വനപ്രദേശങ്ങളുടെ ആവാസവ്യവസ്ഥയും വാഹകശേഷിയും ശാസ്ത്രീയമായി പഠിക്കാൻ വൈല്‍ഡ് ലൈഫ് ഇൻസ്റ്റിറ്റ്യൂട്ടിനെ ചുമതലപ്പെടുത്തിയിട്ടുണ്ട്. കടുവ, ആന എന്നിവയുടെ കൃത്യമായ കണക്കെടുപ്പ് ഇതിന്റെ ഭാഗമായി നടക്കും. പിടികൂടുന്ന കടുവകളെ ഇതര ടൈഗർ റിസർവുകളിലേക്ക് മാറ്റുന്നത് സംബന്ധിച്ച്‌ കേന്ദ്രമന്ത്രിയുമായി ചർച്ച നടത്തിയിട്ടുണ്ടെന്നും ഓഗസ്റ്റ് ആറിന് പാലക്കാട് ഇത് സംബന്ധിച്ച്‌ ഉന്നതതല യോഗം ചേരുമെന്നും മന്ത്രി വ്യക്തമാക്കി.
കർഷകരുടെ പ്രശ്നങ്ങള്‍ക്ക് പരിഹാരം കാണാൻ ജനപ്രതിനിധികളുടെയും ജനജാഗ്രത സമിതികളുടെയും കൂട്ടായ്മ ഉറപ്പാക്കും. കർഷകരുടെ ഭൂമി പൂർണ്ണമായും അവർക്ക് ലഭിക്കുമെന്നും വനഭൂമി സംരക്ഷിക്കുമെന്നും മന്ത്രി കൂട്ടിച്ചേർത്തു. വിവിധ പരാതികള്‍ വേഗത്തില്‍ പരിഹരിക്കുന്നതിനായി ഓഗസ്റ്റ് ഒന്നുമുതല്‍ സംസ്ഥാന വ്യാപകമായി വനം വകുപ്പ് അദാലത്തുകള്‍ സംഘടിപ്പിക്കും. കൃഷിനാശത്തിനുള്ള നഷ്ടപരിഹാരം, കേസുകളുടെ തീർപ്പാക്കല്‍, ഭൂമിയുടെ എൻഒസി സംബന്ധമായ തടസങ്ങള്‍ എന്നിവ ഈ അദാലത്തുകളിലൂടെ പരിഹരിക്കുമെന്നും മന്ത്രി അറിയിച്ചു.
SUMMARY: 60 km of solar fencing to be installed in Wayanad: Forest Minister Shibu Baby John
