ബെംഗളൂരു: എഴുത്തുകാരി കെ.ടി ബ്രിജിയ്ക്ക് തിരുവനന്തപുരം സത്യജിത്ത് റേ സൊസൈറ്റി ഏർപ്പെടുത്തിയ ഗോൾഡൻ പെൻ പുരസ്കാരം. ചെറുകഥാസമാഹാരമായ പ്രാണന്റെ സൂക്ഷിപ്പുകാർ എന്ന പുസ്തകത്തിനാണ് പുരസ്കാരം. അവാർഡ് വിതരണം ഫെബ്രുവരി ഒന്നിന് തിരുവനന്തപുരം എകെജി സ്മാരക ഹാളിൽ ഭക്ഷ്യ സിവിൽ സപ്ലൈ വകുപ്പ് മന്ത്രി ജി ആർ അനിൽ നിർവഹിക്കും.
ചലച്ചിത്ര കലാസാംസ്കാരിക രംഗത്ത് 12 വർഷം പൂർത്തിയാക്കിയ സത്യജിത്ത് റേ ഫിലിം സൊസൈറ്റിയുടെ പതിനൊന്നാമത് പുരസ്കാരങ്ങള്‍ കഴിഞ്ഞദിവസമാണ് തിരുവനന്തപുരത്ത് പ്രഖ്യാപിച്ചത്. സത്യജിത്ത് റേ സംഗീത പുരസ്കാരം, ചലച്ചിത്ര പുരസ്കാരം, ഡോക്യുമെന്ററി ആൻഡ് ഷോർട്ട് ഫിലിം അവാർഡുകൾ, ലിറ്റററി അവാർഡുകൾ എന്നി വിഭാഗങ്ങളിലായാണ് അവാർഡുകൾ പ്രഖ്യാപിച്ചത്.
തൃശ്ശൂര്‍ മാള സ്വദേശിനിയാണ് കെ.ടി ബ്രിജി. കഴിഞ്ഞ 40 വര്‍ഷത്തോളമായി ബെംഗളൂരുവിലാണ് താമസം. ഇംഗ്ലീഷിലും മലയാളത്തിലും എഴുതുന്നു. ചിത്രകാരിയുമാണ്.
നോവൽ, ചെറുകഥ, ബാലസാഹിത്യം, ഇംഗ്ലീഷ് കവിത എന്നീ മേഖലകളിൽ ധാരാളം പുസ്തകങ്ങൾ പ്രസിദ്ധീകരിച്ചിട്ടുണ്ട്. പൂർണ പബ്ലിക്കേഷൻസ്, മനോരമ ബുക്സ്, സൈകതം ബുക്സ്, ടെൽ ബ്രെയിൻ, റെഡ് ചെറി ബുക്സ്, കേരള ഗവ. ബാലസാഹിത്യ ഇൻസ്റ്റി്റ്യൂട്ട്, ഉക്കിയോടോ പബ്ലിക്കേഷൻ എന്നീ പ്രസാധകരുടെ കീഴിൽ ഇംഗ്ലീഷിലും, മലയാളത്തിലും ധാരാളം പുസ്തകങ്ങൾ പ്രസിദ്ധീകരിച്ചു.
നിരവധി പുസ്തകങ്ങളിൽ കഥാപങ്കാളിത്തം.ഭാഷാപോഷിണി ശാസ്ത്രകഥാ പുരസ്കാരം, ഒ.വി വിജയൻ കഥാ പുരസ്കാരം, ബാല സാഹിത്യ അക്കാഡമി പുരസ്കാരം, ശാന്തകുമാരൻ തമ്പി അവാർഡ്, കൈരളി, കഥാരംഗം, ദൂരവാണിനഗര്‍ കേരളസമാജം കഥാ പുരസ്കാരങ്ങൾ, തകഴി കഥാ പുരസ്കാരം, ഇൻ്റർനാഷണൽ മ്യൂസ് അവാർഡ്, നാരി ഉജ്ജാഗരൺ അവാർഡ്, ടെൽ ബ്രെയിൻ പുരസ്കാരം.വുമൺ അച്ചീവേഴ്‌സ് അവാർഡ് തുടങ്ങിയ പുരസ്കാരങ്ങൾ ലഭിച്ചിട്ടുണ്ട്.
SUMMARY: Satyajit Ray Golden Pen Books Award for KT Briji
