ബെംഗളൂരു: വരാനിരിക്കുന്ന ദേശീയ കളരിപ്പയറ്റ് ചാമ്പ്യൻഷിപ്പിനും ഖേലോ ഇന്ത്യ മത്സരങ്ങൾക്കും മുന്നോടിയായി കർണാടക കളരിപ്പയറ്റ് കൗൺസിൽ (കെസികെ) ‘കളരി സംഗമം 2026’ ദേശീയ സിലബസ് പരിശീലന ക്യാമ്പ് സംഘടിപ്പിച്ചു. ഇന്ത്യൻ കളരിപ്പയറ്റ് ഫെഡറേഷന്റെ ഔദ്യോഗിക ഉത്തരവ് പ്രകാരം രൂപീകരിച്ച അഡ്ഹോക് കമ്മിറ്റിയുടെ നേതൃത്വത്തിൽ രാംപുരയിലെ തക്ഷശില സ്കൂളിലായിരുന്നു ക്യാമ്പ് നടന്നത്.
പരിശീലനം, നിരീക്ഷണം, ആശയവിനിമയം, മത്സര ഒരുക്കങ്ങൾ എന്നിവയ്ക്ക് ക്യാമ്പ് വേദിയൊരുക്കി. തക്ഷശില സ്കൂൾ പ്രിൻസിപ്പൽ അഞ്ജലി കെ. ജഗന്നാഥ് ക്യാമ്പിൽ മുഖ്യാതിഥിയായി. അഡ്ഹോക് കമ്മിറ്റി സെക്രട്ടറി കൃഷ്ണപ്രതാപ് പ്രസിഡന്റ് പ്രവീൺ പി. എന്നിവര് സംസാരിച്ചു.
ഐ.കെ.എഫ് സെക്രട്ടറി ജനറൽ ഡോ. അംബു ആർ. നായരുടെ നേതൃത്വത്തിൽ ഇന്ത്യൻ കളരിപ്പയറ്റ് ഫെഡറേഷൻ സംഘടിപ്പിക്കുന്ന ദേശീയ കളരിപ്പയറ്റ് ചാമ്പ്യൻഷിപ്പ് 2026 നവംബർ 27, 28, 29 തീയതികളിൽ തിരുവനന്തപുരത്ത് നടക്കും. രാജ്യത്തെ 20-ലധികം സംസ്ഥാനങ്ങളിൽ നിന്നുള്ള താരങ്ങൾ പങ്കെടുക്കുന്ന ഈ മത്സരം കളരിപ്പയറ്റ് അഭ്യാസികളുടെ ഏറ്റവും വലിയ സംഗമങ്ങളിലൊന്നായിരിക്കും.
സ്പോർട്സ് അതോറിറ്റി ഓഫ് ഇന്ത്യ (SAI) സംഘടിപ്പിക്കുന്ന ഖേലോ ഇന്ത്യ യൂത്ത് ഗെയിംസിലെ കളരിപ്പയറ്റ് മത്സരങ്ങൾ 2026 ഡിസംബർ 18 മുതൽ 20 വരെ തെലങ്കാനയിൽ നടക്കും. സബ് ജൂനിയർ, ജൂനിയർ, സീനിയർ വിഭാഗങ്ങളിലായി 73 വനിതാ-പുരുഷ താരങ്ങളാണ് കർണാടകയെ പ്രതിനിധീകരിക്കുന്നത്. 35 വ്യക്തിഗത, ടീം ഇനങ്ങളിലാണ് ഇവർ മത്സരിക്കുക.
SUMMARY: National Kalaripayattu Championship; ‘Kalari Sangamam’ Training Camp Organized















