ബെംഗളൂരു: നിർധനർക്ക് സ്വന്തമായി വീടൊരുക്കുന്ന ഹോപ്പ് സൊസൈറ്റിയുടെ സാമൂഹിക സംരംഭമായ ‘പ്രോജക്ട് ഷെൽട്ടറിന്‍റെ’ മൂന്നാം വാർഷികവും 50-ാം വീടിന്റെ കൈമാറ്റവും വെള്ളിയാഴ്ച വൈകിട്ട് 5.30-ന് ബെംഗളൂരു വിദ്യാരണ്യപുര വാടേരഹള്ളിയുള്ള ദി കിംഗ്‌സ് മെഡോസിൽ നടക്കും. ചലനശേഷി നഷ്ടപ്പെട്ട ടോബിക്കും കുടുംബത്തിനുമാണ് 50-ാമത്തെ വീട് കൈമാറുന്നത്.
2023 ഒക്ടോബർ 2-ന് ആരംഭിച്ച പ്രോജക്ട് ഷെൽട്ടർ, കഴിഞ്ഞ മൂന്ന് വർഷത്തിനിടയിൽ ദാതാക്കൾ, സന്നദ്ധപ്രവർത്തകർ, കോർപ്പറേറ്റ് സ്ഥാപനങ്ങൾ എന്നിവരുടെ പിന്തുണയോടെ അർഹരായ 49 കുടുംബങ്ങൾക്ക് ഇതിനോടകം വീടുകൾ നിർമ്മിച്ചു നൽകിയിട്ടുണ്ട്.
ചടങ്ങിന്റെ ഭാഗമായി നിരവധി സുപ്രധാന പ്രഖ്യാപനങ്ങളും നടക്കും. രണ്ടാം ഘട്ടമായി അടുത്ത ഒരു വർഷത്തിനുള്ളിൽ 50 വീടുകൾ നിർമ്മിക്കുന്ന സിൽവാപുര അപ്പാർട്ട്മെന്റ് പദ്ധതിയുടെ പ്രഖ്യാപനവും ശിലാസ്ഥാപനവും ചടങ്ങിൽ നടക്കും. അഞ്ച് കുടുംബങ്ങൾക്ക് വീടുകളുടെ ഉടമസ്ഥാവകാശ രേഖകൾ വിതരണം ചെയ്യും.
മുൻ കേന്ദ്രമന്ത്രി ആൽഫോൻസ് കണ്ണന്താനം, മാനന്തവാടി എം.എൽ.എ. ഉഷ വിജയൻ, പത്മശ്രീ ജേതാവും പാരാ ഒളിമ്പ്യൻ താരവുമായ ഡോ. എച്ച്. ബോണിഫേസ് പ്രഭു, നയാര എനർജി ലിമിറ്റഡ് സി.എസ്.ആർ. സീനിയർ മാനേജർ മൃദുൽ ത്രിപാഠി തുടങ്ങിയ പ്രമുഖർ ചടങ്ങിൽ പങ്കെടുക്കും. കൂടാതെ സ്പോൺസർമാരും സന്നദ്ധപ്രവർത്തകരും സംബന്ധിക്കുന്ന ചടങ്ങിൽ, ഏഷ്യാനെറ്റ് സ്റ്റാർ സിംഗർ ഫെയിം തീർത്ഥ സത്യനും ഗ്രൂപ്പ് പിയുഷും ചേർന്ന് അവതരിപ്പിക്കുന്ന ലൈവ് സംഗീത പരിപാടിയും ഉണ്ടായിരിക്കും.
SUMMARY: Project Shelter’s third anniversary and the handover of the 50th house to take place in Bengaluru tomorrow.
